ТОШКЕНТ, 22 сентябрь. /"Дунё" АА/. Австралия, Буюк Британия, Канада ва Португалия бир кунда Фаластин давлатини тан олганини эълон қилди ва минтақада зудлик билан ўт очишни тўхтатишга чақирди, деб хабар бермоқда "Дунё" АА мухбири "Euronews" маълумотига таяниб.

Франция, Буюк Британия, Канада, Австралия, Бельгия ва Португалияни ўз ичига олган бир гуруҳ давлатлар БМТ Бош Ассамблеясининг бугун очиладиган йиллик сессияси олдидан Фаластинни давлат сифатида тан олиш режаларини олдиндан эълон қилди.

"Бугун фаластинликлар ва исроилликлар учун тинчликка ва икки давлат асосидаги ечимга умидни қайта тиклаш мақсадида, Бирлашган Қироллик Фаластин давлатини расман тан олади", – деди Буюк Британия Бош вазири Кир Стармер ўзининг видеомурожаатида.

Канада Бош вазири Марк Карни ўзининг X ижтимоий тармоғидаги саҳифасида шундай ёзди: "Канада Фаластин давлатини тан олади ва ҳам Фаластин давлати, ҳам Исроил давлати учун тинч ва фаровон келажак қуришда ўз ҳамкорлигини таклиф этади".

Шундан сўнг, Португалия ташқи ишлар вазири Паулу Ранжел ҳам Фаластин давлатини тан олганини эълон қилди.

Бунга жавобан Исроил Бош вазири Биньямин Нетаньяху "Бу амалга ошмайди. Иордан дарёсининг ғарбида ҳеч қандай Фаластин давлати ташкил этилмайди" – дея баёнот берди. Исроил раҳбарияти уруш бошланганидан буён бундай имкониятни мунтазам равишда рад этиб келади.

Исроил ТИВ Фаластин давлатини тан олиш "Буюк Британиядаги "Мусулмон биродарлар" ҳаракатидаги иттифоқчилари томонидан руҳлантирилишга ҲАМАС ташкилоти учун мукофотдан бошқа нарса эмас", – дея баёнот берди.

АҚШ Президенти Дональд Трамп ҳам илгари Фаластин давлатини тан олиш ҲАМАСни рағбатлантириши мумкинлигини айтган эди. Бироқ, Кир Стармер билан бўлиб ўтган қўшма матбуот анжуманида у фақатгина шу масалада Бош вазир билан "келишмовчиликлари" борлигини таъкидлаган эди.

Ҳозирда Фаластинни БМТга аъзо 193 давлатнинг тахминан учдан тўрт қисми, жумладан, Ўзбекистон ҳам тан олган. Бироқ, Фаластиннинг халқаро тан олинган чегаралари, пойтахти ва армияси йўқ.

Эслатиб ўтамиз, ҳозирда Исроил Ғазо секторига ҳужумларни давом эттирмоқда. Сектор соғлиқни сақлаш органларининг маълумотларига кўра, деярли икки йилдан бери давом этаётган уруш натижасида Фаластин аҳолисининг катта қисми ўз уйларини тарк этишга мажбур бўлган, ҳалок бўлганлар сони эса 65 мингдан ошган.

"Anadolu" ахборот агентлиги сайтидан олинган сурат.