ВАШИНГТОН, 20 август. /“Дунё” АА/. АҚШ Халқаро жиноий суд (ХЖС) президенти Томоко Акане ва катта прокурори Абдулай Сеега қарши санкциялар жорий қилди, деб хабар бермоқда “Дунё” АА мухбири Давлат департаменти баёнотига таяниб.

АҚШ давлат котиби Марко Рубио таъкидлашича, Томоко Акане ва Абдулай Сее ХЖС юрисдикциясини тан олмайдиган давлатлар мансабдор шахсларини тергов қилиш, ҳибсга олиш, ушлаб туриш ёки жиноий таъқиб қилишга қаратилган ҳаракатларда бевосита иштирок этган.

Рубио ХЖСни “коррупциялашган ва ўта сиёсийлашган” тузилма деб атаб, судни ўз ваколатларини суиистеъмол қилишда айблади.

ХЖС вакиллари эса Вашингтоннинг ушбу қарорини қонун устуворлигига путур етказувчи чора сифатида баҳолади. Суд ходимларига ўз вазифаларини бажаргани учун таҳдид ва босим ўтказилиши халқаро ҳуқуқий тартиботга хавф туғдириши таъкидланди.

Жорий этилган санкциялар АҚШга киришни тақиқлаш, шунингдек, Америка молия тизими орқали молиявий операцияларни амалга оширишга чекловлар қўйишни назарда тутади. Вашингтон аввал ҳам ХЖСнинг бир қатор мансабдор шахсларига нисбатан шунга ўхшаш чораларни жорий этган эди.

АҚШ ХЖСни таъсис этган Рим статути иштирокчиси ҳисобланмайди. Июль ойида Вашингтон судга қарши чораларни янада кучайтириб, ХЖСни АҚШ суверенитетига “номақбул таҳдид” солишда ҳамда америкалик ҳарбийлар ва разведка ходимлари фаолиятини тергов қилишга уринишда айблаган эди.

Бу қарор Дональд Трамп маъмуриятининг ХЖСга қарши навбатдаги чораси бўлди. Аввалроқ Вашингтон суднинг камида 11 нафар вакилига, жумладан, тўққиз нафар судьяси ва бош прокурорига нисбатан санкциялар жорий қилган. Мазкур чекловлар активларни музлатиш чораларини ҳам ўз ичига олади.

Аввалги санкциялар ХЖСнинг Афғонистондаги америкалик ҳарбийлар фаолияти бўйича тергови, Ғазодаги эҳтимолий ҳарбий жиноятлар юзасидан Исроил раҳбарларини, жумладан, Бош вазир Биньямин Нетаньяҳуни ҳибсга олишга берилган ордерлар билан боғлиқ эди.

Июль ойида Марко Рубио ХЖСга аъзо бўлган 125 давлатни суддан чиқишга чақириб, Вашингтон суд фаолиятини “ғиштма-ғишт бузиб ташлаш” ниятида эканини маълум қилган эди.

“Reuters” агентлиги сурати