ҚОҲИРА, 17 сентябрь. /"Дунё" АА/. Ўзбекистон элчиси Мансурбек Қиличов Мисрнинг "Orascom Investment Holding" компанияси раҳбари Нагиб Савирис билан учрашди, деб хабар қилмоқда "Дунё" АА мухбири.

Суҳбат аввалида Нагиб Савирис Ўзбекистонда маҳаллий тадбиркорлар ва хорижий инвесторларни қўллаб қувватлаш бўйича олиб борилаётган ислоҳотларни юқори баҳолади.

Мулоқот чоғида мисрлик инвестор томонидан Ўзбекистонда амалга ошираётган лойиҳалар ҳақида фикр алмашинилди. Мисрлик тадбиркорнинг айтишича, ҳозирда унга тегишли "Nile Sugar" компанияси томонидан Жиззах вилоятида қанд лавлаги етиштириш ва шакар ишлаб чиқариш мажмуасини барпо этиш ҳамда "In2Metals" компанияси томонидан Навоий вилоятида олиб борилаётган геологик ишлар амалга оширилмоқда.

Томонлар "Orascom Investment Holding"нинг Ўзбекистондаги лойиҳаларини жадаллаштириш ва янги инвестициявий дастурларни биргаликда ўрганишга келишиб олдилар.

Нагиб Савирис – мисрлик йирик тадбиркор ва Яқин Шарқдаги телекоммуникация ҳамда инвестиция соҳаларининг энг нуфузли шахсларидан биридир. У "Orascom" конгломератига эгалик қилувчи нуфузли Савирислар оиласининг етакчи аъзоси саналади. Унинг "Orascom Telecom Holding" компанияси 2021 йилгача "Euronews" телеканалининг асосий улушига эгалик қилган. Нагиб Савирис тоғ-кон саноати, ОАВ ва туризм соҳаларига ҳам сармоя киритиши билан танилган. Бизнесдан ташқари, у хайрия фаолияти билан фаол шуғулланади.