ТОШКЕНТ, 1 ноябрь. /«Дунё» АА/. Ўзбекистон ташқи ишлар вазири Бахтиёр Саидов кеча Ашхобод шаҳрида бўлиб ўтган Марказий Осиё давлатлари ташқи ишлар вазирлари ва ЕХҲТ бош котиби форумида иштирок этди, деб хабар бермоқда «Дунё» АА мухбири.

«Ашхобод шаҳрида бўлиб ўтган Марказий Осиё давлатлари ташқи ишлар вазирлари ва Европада хавфсизлик ва ҳамкорлик ташкилоти (ЕХҲТ) Бош котиби форумида иштирок этдик, – деб ёзди Ўзбекистон ТИВ раҳбари ўзининг telegram каналида. – ЕХҲТ Бош котиби Ҳельга Шмид хоним ҳамда Қирғизистон, Қозоғистон, Тожикистон ва Туркманистонлик ҳамкасбларимиз билан умумий кун тартибимизнинг долзарб жиҳатлари, хусусан, чегара хавфсизлигини таъминлаш, иқлим ўзгаришига қарши курашиш ва транспорт алоқаларини ривожлантириш бўйича ҳамкорлик масалаларини муҳокама қилдик».

Эслатиб ўтамиз, Ўзбекистон 1992 йил 26 февралдан буён ЕХҲТ (собиқ Европада хавфсизлик ва ҳамкорлик кенгаши) аъзоси бўлиб, 2018 йил февраль ойида мамлакатимиз ЕХҲТ Парламент Ассамблеяси фаолиятидаги иштирокини тиклаган эди.