ТОШКЕНТ, 14 август. /"Дунё" АА/. Ўзбекистон Ташқи ишлар вазирлиги кеча консуллик хизматларидан фойдаланишда ёрдам бериш ва чет элга ташрифлар давомида йўналишларни аниқлаш учун мўлжалланган "UZ Embassies and Consulates" иловасини ишга туширди, деб хабар қилмоқда "Дунё" АА мухбири.

Хизмат шиори: "Сизнинг саёҳатингиз бизнинг ташвишимиз: ҳар қадамда консуллик ёрдами!"

Илова орқали қуйидаги хизматлардан фойдаланишингиз мумкин:

-Қидирув ёки интерактив харита орқали дунёнинг исталган нуқтасида Ўзбекистон элчихоналари ва консулликларини топиш;

-Ҳар бир элчихона ҳақида батафсил маълумотга эга бўлиш: манзил, телефон, электрон почта ва веб-сайт ҳаволалари - барчаси бир жойда!

-Ҳар бир дипломатик миссия тақдим этадиган кенг кўламли хизматлар ҳақида билиш: визаларни расмийлаштириш, паспортларни янгилаш, консуллик ёрдами ва бошқалар.