ТОШКЕНТ, 30 январь. /"Дунё" АА/. Ўзбекистон делегацияси кеча Озарбайжон ва Туркия вазирлари билан биргаликда иккинчи уч томонлама учрашувда иштирок этди, деб хабар бермоқда "Дунё" АА мухбири.

"Ташқи ишлар, савдо, иқтисодиёт ва транспортга масъул вазирлар билан биргаликда 2-уч томонлама учрашувни муваффақиятли ўтказдик, – деб ёзди Ўзбекистон ТИВ раҳбари Бахтиёр Саидов ўзининг tеlеgrаm-каналида. – Самарали дипломатия, динамик сармоявий ҳамкорлик, савдо ҳажмини ошириш ва алоқаларни кенгайтириш орқали уч қардош халқлар нафақат ўзлари, балки вакиллик қилаётган минтақалар учун ҳам фойда келтиради.

Муҳокамаларимиз кенг қамровли бўлиб, энг долзарб масалаларни ҳал этиш ва мамлакатларимиз учун энг қулай шарт-шароитларни яратиш билан бирга турли тўсиқларни бартараф этиш бўйича аниқ қадамларни белгилаб берди. Учрашувимизнинг асосий натижаси халқларимизнинг барқарор ривожланиши учун дўстлигимиз ва ҳамкорлигимизни мустаҳкамлаш йўлидаги муҳим қадам бўлган Анқара декларациясининг имзоланиши бўлди".