ТОШКЕНТ, 19 ноябрь. /"Дунё" АА/. Ўзбекистон Ташқи ишлар вазири ўринбосари Музаффар Мадраҳимов Венгриянинг Ўзбекистондаги Фавқулодда ва мухтор элчиси Ёжеф Рожа билан учрашди, деб хабар бермоқда "Дунё" АА мухбири.

ТИВ маълумотига кўра, учрашувда ўзбек-венгрия ҳамкорлигининг ҳозирги ҳолати ва истиқболлари, сиёсий, савдо-иқтисодий ҳамда маданий-гуманитар соҳалар, 2026 йилга мўлжалланган режалар муҳокама қилинди.

Томонлар Ўзбекистон ва Венгрия ўртасидаги кенгайтирилган стратегик шерикликни янада мустаҳкамлаш ва ҳамкорликни амалий мазмун билан бойитишни қўллаб-қувватлаган.

Мулоқот жараёнида бир қатор қўшма тадбирларни ўтказиш, жумладан, ташқи сиёсат идоралари ўртасида сиёсий маслаҳатлар, савдо-иқтисодий ҳамкорлик бўйича Ҳукуматлараро комиссиянинг навбатдаги мажлислари, ишбилармонлар кенгаши, ҳудудлар ва университет ректорларининг форумларини ташкил этиш бўйича келишувларга эришилди.