ИСЛОМОБОД, 15 ноябрь. /"Дунё" АА/. Покистондаги Баҳрия университетининг Гуманитар ва ижтимоий фанлар факультети декани, профессор Адам Сауд "Дунё" АА учун интервьюсида Ўзбекистон Президентининг "Марказий Осиё янги давр остонасида" номли мақоласи ҳақида фикр билдирди:

– Ўзбекистон Президентининг "Марказий Осиё янги давр остонасида" сарлавҳали мақоласини катта қизиқиш билан ўқиб чиқдим. Албатта, Президент Шавкат Мирзиёевнинг ушбу мақоласи ҳақида фикр билдириш ҳар бир экспертга катта масъулият юклайди. Ўзбекистон Президенти Марказий Осиёда тинчлик ва барқарорликни таъминлаш, йиллар давомида тўпланиб қолган муаммоларни, хусусан, давлат чегаралари билан боғлиқ ҳолатларни ҳал этишдаги саъй-ҳаракатларини ҳеч ким инкор этолмайди. Мақолада, ана шу жиҳатлар қаламга олинган, минтақада кечаётган бугунги воқеликлар, мамлакатлар ўртасида сўнгги йилларда вужудга келган яқин қўшничилик алоқалари ва мавжуд муаммолар чуқур таҳлил қилинган.

Марказий Осиё ўз тараққиётининг янги, тарихий аҳамиятга молик босқичига қадам қўймоқда. Бугун чинакам бирдамлик босқичига ўтяпти. Минтақада узоқ йиллар давомида илк бор биргаликда олдинга қараб бориш учун пойдевор бўлиб хизмат қилаётган ўзаро ишонч, яхши қўшничилик ва ҳурмат муҳити шаклланмоқда.

Минтақавий ҳамкорлик борасида бошланган янги босқичнинг энг муҳим ютуқларидан бири – чегара масалалари узил-кесил ҳал этилганидир. Яқин-яқингача имконсиз туюлган бу муаммонинг ечими бугун реал ҳолатга, бир пайтлар минтақа давлатларини ажратиб турган чегаралар эса дўстлик ва ҳамкорлик кўпригига айланди. 2025 йил март ойида Ўзбекистон, Қирғизистон ва Тожикистон ўртасида уч давлатнинг чегаралари туташган нуқта тўғрисидаги Шартнома ва Хўжанд декларациясининг имзолангани тарихий аҳамиятга молик ҳодисадир. Буни ҳақли равишда оламшумул воқеа деб аташ мумкин.

Мен ҳар сафар Ўзбекистонга борганимда улкан ўзгаришларга гувоҳ бўламан. Бу қувонарли, албатта. Шу ўринда таъкидлаш керакки, Ўзбекистон Президенти нафақат Марказий Осиё минтақасини бирлаштирди, балки Марказий ва Жанубий Осиё ўзаро боғлиқлигини  янада мустаҳкамлашда ҳам асосий роль ўйнамоқда. Президент Шавкат Мирзиёевнинг Жанубий Осиё мамлакатлари, хусусан, Покистон билан ҳамкорликни ривожлантиришга қаратаётган юқори эътибори, мамлакатларимиз ва халқларимиз фаровонлигини таъминлашга муҳим ҳисса бўлиб қўшиляпти.

Президент Шавкат Мирзиёев Янги Марказий Осиёни барпо этиш борасида бошланган жараён ортга қайтмас йўл эканини таъкидлар экан, минтақада тинчлик, барқарорлик ва фаровонликни таъминлаш йўлидаги тарихий бирликни асраб-авайлаш барча мамлакатлар олдидаги умумий вазифа эканини билдирди. Давлат раҳбарининг бу фикрлари Жанубий Осиё мамлакатлари учун бирдек муҳим, деб ўйлайман.