НЬЮ-ЙОРК, 15 май. /"Дунё" АА/. Шу йилнинг 5- 9 апрель кунлар пойтахтимизда бўлиб ўтган Парламентлараро иттифоқнинг 150-юбилей ассамблеяси якунлари бўйича қабул қилинган ижтимоий тараққиёт ва адолат йўлида парламент ҳаракатларига бағишланган – Тошкент декларацияси БМТ Бош Ассамблеяси 79-сессиясининг расмий ҳужжати сифатида эълон қилинди, деб хабар қилмоқда "Дунё" АА мухбири.

Ҳужжат Бирлашган Миллатлар Ташкилотининг барча олтита расмий тилларида (инглиз, араб, испан, хитой, рус ва француз) нашр этилди. Шунингдек, ташкилотга аъзо давлатлар, унинг таркибий бўлинмалари ўртасида кенг тарқалди ҳамда расмий ҳужжатлар тизимида эълон қилинди.

Бош Ассамблея ҳужжатига кўра, ижтимоий тараққиёт ва адолат йўлида парламент ҳаракатларига бағишланган Тошкент декларациясида улкан мақсад, вазифа ва йўналишлар белгилаб берилган. Унда ижтимоий тараққиёт борасидаги саъй-ҳаракатларни янгилашга қаратилган ишлар, мавжуд ва юзага келаётган муаммолар ечимини биргаликда излаш зарурлиги алоҳида таъкидланган.

Декларацияда ҳукуматларга ижтимоий ривожланишга комплекс ёндашиш ва ҳар бир давлат томонидан мустақил равишда қуйидаги учта йўналиш бўйича белгиланиши керак бўлган сиёсий ислоҳотлар пакетини амалга ошириш тавсия этилганлиги алоҳида таъкидланади:

Биринчиси, одамларга, яъни уларнинг таълимига, соғлиғига ва атроф-муҳитга, шунингдек, ҳаётнинг барча босқичларида одамлар гуллаб-яшнаши ва имкон қадар тўлиқ ҳаёт кечириши учун ижтимоий тараққиётнинг асосий шарти бўлган ижтимоий муносабатларни ўрнатиш, бизнес бошлаш ёки муносиб иш топиш имконини берадиган кўникмаларга сармоя киритиш.

Иккинчиси, иқтисодиётни демократлаштириш, у барча инсонлар манфаатларига жавоб бериши, уларнинг салоҳиятини кучайтириши, эҳтиёжларини қондириши учун ҳар бир киши муваффақиятга эришиш имкониятига эга бўлиши керак. Аъзо мамлакатларнинг солиқ-бюджет ва пул-кредит сиёсати ҳам сифатли бандликни таъминлашга, жумладан, тадбиркорликни ривожлантиришга ҳам, қарорлар қабул қилиш жараёнида барча одамларни, айниқса, аёллар ва ёшларни жалб этиш орқали ижтимоий ҳамжиҳатликни мустаҳкамлашга кўпроқ йўналтирилиши лозим.

Учинчиси, нафақат давлат органлари, жумладан, парламентлар ҳамда миллий ва муниципал миқёсда фаолият юритувчи, балки аҳолининг ижтимоий ривожланиш соҳасидаги эҳтиёжларини турли йўллар билан қондирадиган давлат бошқаруви органлари ва оммавий ахборот воситаларини ҳам ўз ичига олган институтлар мавқеини мустаҳкамлаш. Шу муносабат билан жаҳон миқёсида халқаро молия институтлари, Халқаро меҳнат ташкилоти ва умуман БМТ тизими каби кўп томонлама ташкилотларга эҳтиёж борлиги таъкидланган.

Бундан ташқари, ҳужжат барча парламентлар ва барча парламент аъзоларини Тошкент декларациясини амалга ошириш учун масъулиятни ўз зиммасига олишга ва ўзгаришлар жараёнини умумжаҳон иштироки учун очиқ бўлган миллий режаларни ишлаб чиқишдан бошлашга чақиради.