ВАРШАВА, 20 апрель. /"Дунё" АА/. "Польша-Шарқ" уюшмаси президенти Юсеф Брыль "Дунё" АА учун интервьюсида Ўзбекистон Президенти Шавкат Мирзиёевнинг 18-19 апрель кунлари Тожикистонга буюрган ташрифи якунлари ҳақидаги фикрларини билдирди:

— Ўзбекистон минтақада асосий геосиёсий ўринни эгаллайди. Президент Шавкат Мирзиёев томонидан илгари сурилган халқаро майдонлардаги ташаббуслар жаҳон ҳамжамиятининг алоҳида эътиборига лойиқдир. Ўзбекистон Президентининг саъй-ҳаракатлари натижасида минтақада дўстона муҳит шаклланди, мамлакатлар ўртасида яхши қўшничилик муносабатлари ўрнатилди.

 Ўзбекистон етакчисининг Тожикистонга навбатдаги ташрифи икки мамлакат раҳбарлари ўртасида ўзбек ва тожик халқлари манфаати йўлида олиб борилаётган конструктив мулоқотнинг яна бир тасдиғидир.

Шуни алоҳида таъкидлашни истардимки, мамлакатлар ўртасида кўплаб ўз ечимини кутаётган муаммолар бор эди. Ўзбекистон Президентининг 2018 йил март ойида, 18 йил ичида биринчи марта Тожикистонга тарихий ташрифи ушбу масалаларни ечишда катта роль ўйнади.

Албатта, ушбу ташриф минтақалараро алоқаларни янада яқинлаштиришга, икки қўшни давлат халқларининг кўп асрлик муштарак ва тарихий алоқаларини мустаҳкамлашга ёрдам беради ҳамда икки давлат ўртасидаги муносабатларни сифат жиҳатидан янги босқичга олиб чиқади.

Иттифоқчилик муносабатлари тўғрисидаги тарихий шартномани имзоланиши стратегик шерикликдан кейин мамлакатлар ўртасидаги муносабатларнинг энг юқори даражаси бўлиб, бу икки мамлакатнинг ортга қайтмас ва яхши қўшничилик сиёсатининг навбатдаги босқичидир.