ЎШ, 4 июль. /"Дунё" АА/. Ўзбекистон кучли сел-сув тошқинларидан жабр кўрган Қирғизистон халқига инсонпарварлик ёрдами юборди, деб хабар қилмоқда "Дунё" АА мухбири.

Шу муносабат Боткен вилоятидаги Қизил-Қия чегара назорат ўтиш пунктида Ўзбекистон фавқулодда вазиятлар вазирининг биринчи ўринбосари Санжар Зупаров, мамлакатимиз бош консули Зафарбек Ахмедов ва Қирғизистон расмийлари иштирокида инсонпарварлик ёрдамини топшириш маросими бўлиб ўтди.

Инсонпарварлик ёрдами ҳодисадан энг кўп зарар кўрган Ноокат тумани ҳокимлигига топширилди.

Қирғизистон томони инсонпарварлик ёрдами учун миннатдорлик билдирди.

Жорий йилнинг 28 июнь куни Ўш ва Боткен вилоятларида кучли ёмғир ёғиши сабабли, сел-сув тошқинлари юзага келди. Ушбу табиий офат натижасида 10 дан ортиқ одамлар, жумладан ёш болалар вафот этди ҳамда кўплаб аҳоли пунктлари зарар кўрди, 1300 дан ортиқ аҳоли эса доимий яшаш жойидан кўчирилди.