ТОШКЕНТ, 10 май. /"Дунё" АА/. Ўзбекистон Қуролли Кучлар давлат музейида 9 май – Хотира ва қадрлаш кунига бағишланган маънавий-маърифий тадбир бўлиб ўтди, деб хабар қилмоқда "Дунё" АА мухбири.

Унда Ўзбекистон Мудофаа вазирлиги фахрийлар кенгаши, Мудофаа вазирлиги Оила масалалари бошқармаси вакиллари, Қуролли Кучлар академияси курсантлари, Жаҳон иқтисодиёти ва дипломатия университети (ЖИДУ) профессор-ўқитувчилари ҳамда талабалари қатнашди.

Учрашувда Иккинчи жаҳон урушида қозонилган буюк Ғалабага ўзбек халқининг қўшган беқиёс ҳиссаси алоҳида таъкидланди. Иштирокчилар Иккинчи жаҳон уруши фронтларида озодлик ва тинчлик учун жонларини фидо қилган қаҳрамонларимиз хотирасини чуқур миннатдорлик билан ёдга олдилар.