ТОШКЕНТ, 5 сентябрь. /"Дунё" АА/. Ўзбекистон Президентининг Афғонистон бўйича Махсус вакили Исматулла Иргашев кеча амалдаги Европада хавфсизлик ва ҳамкорлик ташкилоти (ЕХҲТ) раисининг махсус элчиси Терри Ҳакала билан учрашув ўтказди, деб хабар қилмоқда "Дунё" АА мухбири.

ТИВ хабари, учрашув чоғида томонлар Афғонистон масаласида ҳамкорликнинг ҳозирги босқичини муҳокама қилдилар. Шу билан бирга, афғон муаммосини тинчлик йўлидаги саъй-ҳаракатлар орқали ҳал этишда мунтазам мулоқотни давом эттиришга ўзаро интилиш қайд этилди.

Терри Ҳакала Ўзбекистоннинг Афғонистон масаласида ягона минтақавий ёндашувни шакллантириш йўлидаги саъй-ҳаракатларини юксак баҳолади.

Шунингдек, учрашувда Афғонистон миллий иқтисодиётини тиклаш, шунингдек, мазкур мамлакатни минтақавий интеграция жараёнларига жалб этиш истиқболлари юзасидан фикр алмашилди.

Учрашув конструктив руҳда ўтди ва Ўзбекистон ҳамда ЕХҲТ ўртасида амалий мулоқотни янада ривожлантиришга бўлган ўзаро интилиш тасдиқланди.

Эслатиб ўтамиз, Тери Ҳакала 2021-2025 йилларда Европа Иттифоқининг Марказий Осиё бўйича махсус вакили бўлиб ишлаган.

"Дунё" АА олган сурат