АЛ-КУВАЙТ, 30 сентябрь. /"Дунё" АА/. Ўзбекистон элчихонаси ходимлари "Lulu Group International" компаниясининг Кувайтдаги ваколатхонаси  мутасаддилари билан музокара ўтказдилар, деб хабар қилмоқда "Дунё" АА мухбири.

Мулоқотда Ўзбекистонда етиштирилган ва ишлаб чиқарилган маҳсулотларни хорижий давлатларга экспорт ҳажмини янада ошириш  йўналишида ҳамкорлик қилиш истиқболлари муҳокама қилинди.

  Дипломатлар ўзбек маҳсулотларининг экспорти учун тақдим этилаётган имтиёзлар, хорижий импортёрлар учун яратилган қулайликлар ҳақида сўзлаб беришди.

Lulu Group International" вакиллари Ўзбекистондан мева ва сабзавотларни Кувайтга экспортини йўлга қўйишга қизиқиш билдирди. Кувайт томонига кўра, Ўзбекистон маҳсулотлари "Lulu Hypermarket"нинг Кувайтдаги 16 та савдо тармоқлари орқали сотиш режалаштирмоқда.

Томонлар ўзбек маҳсулотларини Кувайтга олиб келиш бўйича  транспорт-логистика йўллари хусусида ҳам  фикр алмашдилар.

 Мамлакатимиз элчихонаси кўмагида, яқин кунларда Ўзбекистондан Кувайтга "Jazeera" авиакомпанияси ҳаво қатновлари орқали 3 тонна ҳўл мевалар олиб келиниши қайд этилди.

Бундан ташқари, жорий йилнинг 16-21 октябрь кунлари Тошкент шаҳри, Фарғона ва Сирдарё вилоятларида "Ўзбекистон-Кувайт" бизнес-форумлари ўтказилиши маълум қилинди ва унга иштирок этиш таклифи билдирилди.