МАДРИД, 15 январь. /«Дунё» АА/. Мамлакатимизнинг Мадрид шаҳридаги элчихонасида Испаниядаги энг йирик, Европада эса бешликка кирувчи «Сантандер» банкининг минтақавий менежери Давид Плаза билан учрашув бўлиб ўтди, деб хабар бермоқда «Дунё» АА мухбири.



Суҳбат чоғида испан томони Ўзбекистон банк хизматлари бозорига кириш ҳамда мамлакатимизда амалга оширилаётган истиқболли йирик инвестицион лойиҳаларни молиялаштириш масалаларига қизиқиш билдирди. Шунингдек, мазкур лойиҳаларни молиялаштириш учун «Сантандер» банки Ўзбекистонга 500 млн доллар миқдорида кредит маблағларини ажратишга тайёрлигини маълум қилди.

Қайд этилишича, банк сўнгги икки йилда экспорт-импорт операциялари соҳасида тузилган битимлар сони бўйича Европада етакчи бўлиб келмоқда.

Учрашув якунида Ўзбекистонда инвестиция лойиҳаларини молиялаштириш имконияти Испания банкининг ваколатхонаси очилишини жадаллаштириш омили бўлиши таъкидланди.