БУДАПЕШТ, 10 сентябрь /"Дунё" АА/. Ўзбекистон элчиси Ойбек Шахавдинов Венгриянинг "Gilan Trading Kft" компанияси эгаси Умар Шархон билан учрашув ўтказди, деб хабар бермоқда "Дунё" АА мухбири.

Музокаралар давомида "Gilan Trading Kft" компанияси қуритилган мева ва сабзавотларни қайта ишлаш ва сотиш борасида нафақат Венгрия, балки Европа бозорларида ҳам етакчи экани маълум қилинди.

Умар Шархон мамлакатимизда қуритилган мева ва сабзавотларни экспорт қилувчи корхоналарга қайта ишлаш ва қадоқлаш жараёнларини сифатли амалга оширишда ўз маслаҳатларини беришга ҳамда Ўзбекистоннинг Европа бозорига кириши учун хаб вазифасини бажаришга тайёр эканини маълум қилди.

Компаниянинг жамоатчилик билан алоқалар бўйича менежери Питер Демингер ўз интервьюсида Европа бозорларига қуритилган меваларни етказиб беришда Ўзбекистон билан ҳамкорликни кенгайтиришга катта аҳамият қаратишини таъкидлади:

– Мамлакатингиз билан ҳамкорлик бўйича маълум тажрибага эгамиз. Бироқ бугунги кунда Ўзбекистондан сотиб олаётган маҳсулотларимиз етарли даражада эмас. Биз уларни кенгайтиришга тайёрмиз. Ўзбекистон қишлоқ хўжалиги меваларининг марказига айланишдан манфаатдормиз. Компаниямиз Лидл, Алди, Спар, Метро ва бошқалар каби Европанинг энг йирик тармоқларига қуритилган меваларнинг асосий етказиб берувчиларидан бири ҳисобланади. Ўзбекистон элчиси билан мамлакатингиздан қуритилган мевалар етказиб беришни кўпайтириш бўйича чора-тадбирларни атрофлича муҳокама қилдик.

Учрашув якунида томонлар халқаро стандартларга мос келувчи, барча зарур сертификатларга эга қуритилган мева-сабзавотларни қайта ишлаш ва сотишда "Gilan Trading Kft" компанияси билан узоқ муддатли шериклик муносабатларини ривожлантириш мақсадида конструктив мулоқот ва ҳамкорликни давом эттиришга келишиб олдилар.

"Gilan Trading Kft" компаниясига 1997 йилда асос солинган бўлиб, Венгриянинг Пати шаҳрида жойлашган. Компания озиқ-овқат саноати соҳасида фаолият юритиб, қуритилган мева-сабзавотлар, ёғли уруғлар, сут ва шоколад билан қопланган Венгрия ва Узоқ Шарқ ингредиентлари аралашмасига ихтисослашган.