МАДРИД, 14 апрель. /“Дунё” АА/. Испаниянинг Сан-Пабло СЕУ университети профессори, Марказий Осиё минтақаси бўйича мутахассис Антонио Алонсо “Дунё” АА мухбирига Қозоғистон Президентининг Ўзбекистонга амалий ташрифи ҳақида фикр билдирди:

– Президентлар Шавкат Мирзиёев ва Қасим-Жомарт Тоқаевнинг Бухорода бўлиб ўтган саммити Ўзбекистон ва Қозоғистон ўртасидаги кенгайиб бораётган стратегик синергиянинг ёрқин далили эканини таъкидламоқчиман.

Энг муҳими, етакчиларнинг Ўзбекистон–Қозоғистон мунтазам мулоқоти декларатив эмас, балки амалиётга йўналтирилган характерга эга. Аниқ натижалар – товар айирбошлашнинг ўсиши, саноат кооперациясининг кенгайиши ва инфратузилма лойиҳаларининг илгари сурилиши икки томонлама муносабатларнинг барқарор динамикасидан далолат беради. Кўрсаткичнинг 5 миллиард АҚШ долларига етгани ва товар айирбошлашни янада кўпайтириб, 10 миллиард долларга етказиш мақсад қилингани иқтисодий ишонч ва ўзаро манфаатдорлик юқори эканидан далолат беради.

Транспорт-логистика соҳасидаги ўзаро боғлиқликни ривожлантиришга алоҳида эътибор қаратилган. Глобал таъминот занжирларининг ўзгариши шароитида айнан шундай ташаббуслар Марказий Осиёнинг муҳим транзит ва интеграция макони сифатидаги янги геоиқтисодий ролини шакллантиради.

Томонларнинг энергетика масалаларини, жумладан, “яшил” энергетика соҳасидаги лойиҳаларни, шунингдек, сув ресурсларидан оқилона фойдаланишни биргаликда ҳал этишга интилиши ҳам ижобий натижалар бермоқда. Бу йўналишлар бутун минтақанинг барқарор ривожланиши учун ҳал қилувчи аҳамиятга эга.

Рақамлаштириш ва электрон тижоратдан тортиб космик технологияларгача бўлган инновацион соҳаларда ҳамкорликни кенгайтириш ҳам муҳим аҳамиятга эга. Бу икки томонлама ҳамкорлик келажакка йўналтирилган сифат жиҳатидан янги босқичга кўтарилганидан далолат беради.

Умуман олганда, учрашув натижалари Ўзбекистон–Қозоғистон муносабатлари бугунги кунда Марказий Осиёда барқарорлик, иқтисодий ўсиш ва минтақавий интеграциянинг асосий омилларидан бири эканини тасдиқлайди. Ўзаро ҳамкорликнинг бундай шакли самарали ва узоқни кўзлаган ҳамкорликка мисол бўла олади.