СЕУЛ, 2 июль. /"Дунё" АА/. Шу йилнинг 26-28 июнь кунлари Жанубий Кореянинг Инчхон шаҳрида илк бор "Incheon International Folk Film Festival" кинофестивали бўлиб ўтди, деб хабар қилмоқда "Дунё" АА мухбири.

Қувонарлиси, мазкур фестивалда таниқли ўзбек кинорежиссёри Мелис Абзалов томонидан суратга олинган машҳур "Суюнчи" фильми ҳам намойиш этилди ва танловда "Энг яхши фильм" деб эътироф этилди.

Фестиваль доирасида дунёнинг турли мамлакатларидан келган режиссёрлар ўз халқларининг анъаналари, урф-одатлари ва бой маданий меросини кино орқали намоён этишди. Шундай юксак маънавий ва бадиий мақсадларга тўла мос бўлган "Суюнчи" фильми 40 дан ортиқ давлат фильмлари орасида, нафақат ҳакамлар ҳайъатининг эътиборини қозонди, балки томошабинлар қалбини ҳам забт этди.

Фильмда ўзбек халқининг қадимий анъаналари, оилавий қадриятлари ва миллий урф-одатлари чуқур ҳамда таъсирчан равишда акс этган. "Суюнчи" фильми нафақат чиройли ҳикоя ва образлар орқали, балки халқ оғзаки ижоди ва фольклор элементлари билан бойитилган саҳналари орқали ҳам алоҳида эътирофга лойиқ кўрилди.

Фестиваль ҳакамлар ҳайъати фильмни "фольклор ва замонавий кинематографияни маҳорат билан уйғунлаштирган, авлодлар ўртасидаги бағрикенглик ва узвийликни юракдан туюнтира олган асар" дея таърифлади.

"Суюнчи" фильмининг халқаро миқёсда эътироф этилиши Ўзбекистон кино санъати учун катта ютуқ ҳисобланади, шунингдек, мамлакатимиз киноусталарининг ижодий салоҳиятининг яна бир бор тан олинишидир. Шунингдек, бу ғалаба юртимизнинг маданий меросига бўлган жаҳон кино жамоатчилигининг қизиқиши ортиб бораётганини ҳам намоён этди.

Тадбир доирасида Ўзбекистон элчихонаси томонидан мамлакатимиз тарихи, маданияти урф-одатлари, санъати, сайёҳлик салоҳияти ҳамда икки мамлакат ўртасидаги дўстона алоқаларга бағишланган йирик кўргазма ҳам ташкил этилди. Ўзбекистоннинг бой маданий мероси ва туризм салоҳиятини акс эттирувчи китоб ва қўлланмалар, миллий либослар, ҳунармандчилик, зардўздлик, ёғоч ўймакорлиги, ипакчилик маҳсулотлари ва бошқа халқ амалий санъати намуналари меҳмонларда катта таассурот қолдирди.