РИМ, 15 июнь. /"Дунё АА/. Италиянинг "La Nazione" газетасида "Ўзбекистон, Жаҳон чемпионати йўлланмасини қўлга киритди: Флоренциядаги ўзбек жамоатчилиги хурсанд" сарлавҳали мақола чоп этилди, деб хабар қилмоқда "Дунё" АА мухбири.

Мақолада футбол бўйича Ўзбекистон миллий терма жамоаси саралаш босқичидан муваффақиятли ўтиб, Жаҳон чемпионати йўлланманисини қўлга киритгани ҳақидаги хабар Флоренцияда ҳам катта шов-шувга сабаб бўлгани ва ўзбеклар кўп истиқомат қилувчи Тоскана марказида тантана билан нишонлангани ҳақида сўз боради.

"Миллий ўзбек қўшиқлари ва рақслари оcтида кўк-оқ футболкалардаги мухлислар Ўзбекистон байроғини кўтариб, бир-бирларини қутладилар. Улар ушбу тарихий ютуқ қувончини биргаликда ҳис этишди. Бу спортнинг одамларни бирлаштириш ва географик чегараларни енгиб ўтиш, ҳатто ватандан минглаб километр узоқда ҳам ўзлигини англаш ва ғурур ҳиссини уйғота олишини исботлади", – деб ёзади муаллиф.

Нашрда қайд этилишича, бу хурсандчилик фонида, Ўзбекистоннинг Флоренциядаги фахрий консули Комуччи ҳам ўзининг қутлов сўзларини билдирди.

"Ўзбекистонни Италияда тарғиб қилиш бўйича ишларимиз, мамлакат миллий терма жамоасининг мундиаль йўлланмасини қўлга киритиши баробарида, ажойиб ўсишни қайд этди. Ушбу тарихий натижа Флоренция ва Самарқанд ўртасидаги биродарлик муносабатлари контекстида янада чуқурроқ маъно касб этади. Флоренцияга Ўзбекистоннинг футболдаги муваффақиятидан келган қувонч бу алоқани янада мустаҳкамлайди, маданий алмашинув ва ўзаро танишув қандай қилиб спорт каби йўналишлар орқали ҳам гуллаб-яшнаши мумкинлигини кўрсатади", – дея фахрий консул сўзларидан иқтибос келтирилган нашрда.

Шунингдек, консул Комуччининг фикрига кўра, Жаҳон чемпионатига йўлланмаси шунчаки спорт соҳасидаги муваффақият эмас, балки Ўзбекистоннинг халқаро майдондаги ўрнини тасдиқлашнинг кучли воситасидир.

"Бу муваффақият Ўзбекистонга мисли кўрилмаган глобал миқёсда танилиш, стереотипларни енгиб ўтиш ва мамлакатнинг замонавий, динамик қиёфасини намойиш этиш имкониятидир. Ўзбекистон дунёга нафақат бой тарих ва анъаналарга эга мамлакат, балки келажакка интилувчи, жаҳон майдонида тобора муҳим роль ўйнашга тайёр давлат эканлигини ҳам кўрсатади", – дея урғуланган мақола якунида.