ОСТОНА, 21 сентябрь. /“Дунё” АА/. Қозоғистоннинг “DKNews” ахборот агентлигида Ўзбекистон – Жанубий Корея муносабатлари ҳамда Марказий Осиё билан ҳамкорлик алоқаларига бағишланган мақола эълон қилинди, деб хабар бермоқда “Дунё” АА мухбири.

Нашрда таъкидланишича, 30 йил ичида Ўзбекистон ва Жанубий Корея ўртасидаги шерикчилик анъанавий савдо-иқтисодий алоқалар доирасидан чиқиб, саноат, соғлиқни сақлаш, таълим, рақамлаштириш ва инвестиция соҳаларини қамраб олди.

Агентлик 16 сентябрь куни Сеулда бўлиб ўтган “Марказий Осиё – Корея Республикаси” саммитига алоҳида эътибор қаратган. Мақолада ёзилишича, янги формат алоҳида икки томонлама лойиҳалардан минтақавий ишлаб чиқариш занжирлари ва қўшма технологик ташаббусларга ўтиш учун имкон яратади.

Материалда иқтисодий ҳамкорлик кўрсаткичларига ҳам тўхталиб ўтилган. 2025 йилда Ўзбекистоннинг Корея Республикаси билан товар айирбошлаш ҳажми 1,7 миллиард долларга етди. 2016–2025 йилларда Жанубий Кореядан жалб қилинган инвестиция ва кредитлар ҳажми эса 2 миллиард долларга яқинлашди.

“DKNews” истиқболли йўналишлар қаторида муҳим минераллар, сунъий интеллект, саноат кооперацияси, транспорт, энергетика, таълим ва мутахассисларни тайёрлаш соҳаларини ажратиб кўрсатган. Ўзбекистоннинг янги минтақавий форматнинг асосий иштирокчиларидан бири сифатидаги ўрни алоҳида таъкидланган.