АНҚАРА, 29 август. /“Дунё” АА/. Туркиянинг “Konya’nın Sesi” (“Коня овози”) нашрида таниқли журналист Йилмаз Сандикчининг “Ўзбекистондан саломлар” сарлавҳали мақоласи эълон қилинди, деб хабар бермоқда “Дунё” АА мухбири.

Мақолада журналистнинг Тошкент ва Самарқандга амалга оширган саёҳатлари давомида кўрган-кечирганлари, сафари чоғида олган таассуротлари баён этилган.

Муаллифнинг ёзишича, у 2024 йилда оиласи билан аждодлар юрти – Ўзбекистонга саёҳат қилган. Ўша пайтда ўз таассуротларини қоғозга туширишга улгурмаган. Бу сафар эса кузатувларини ўқувчилар билан баҳам кўришга қарор қилган.

Мақоланинг асосий ғояси шундан иборатки, муаллиф учун Туркия ва Ўзбекистон ўртасидаги яқинлик фақат географик ёки сиёсий хусусиятга эга эмас. Бу яқинлик, аввало, умумий тарих, тил ва маданиятга асосланган.

Материалда миллий ўзлик масаласига ҳам алоҳида эътибор қаратилган. Муаллиф миллатни севишни инсонга хос табиий туйғу сифатида баҳолайди. Ирқчилик эса бошқаларни камситиш ва ўзини устун қўйиш билан боғлиқ эканини таъкидлайди.

Нашрда қайд этилишича, 2026 йил май ойида Самарқанд шаҳрида Осиё тараққиёт банки Бошқарувчилар кенгашининг 59-йиллик йиғилиши бўлиб ўтди. Унда 100 дан зиёд мамлакатдан минглаб иштирокчилар қатнашди. Июнь ойида Самарқандда ўтказилган йирик стартаплар ва инвесторларни бирлаштирган “Take Off Samarkand 2026” тадбири ҳам юксак савияда ташкил этилган.

Қадимда Буюк Ипак йўлининг энг муҳим чорраҳаларидан бири бўлган Самарқанд бугун ҳам савдо, инвестиция ва иқтисодий алоқалар марказига айланмоқда.

Журналист Ўзбекистоннинг 38 миллионлик аҳолиси, ёш меҳнат ресурслари, табиий бойликлари, ривожланаётган саноати ва Марказий Осиёдаги қулай географик ўрнига алоҳида эътибор қаратган. Унинг фикрича, ушбу омиллар мамлакатнинг иқтисодий салоҳияти ва минтақадаги аҳамиятини янада оширмоқда.

Йилмаз Сандикчининг таъкидлашича, қардошлик – фақат ўтмишни бирга эслаш эмас, балки келажакни ҳам бирга қуришдир. Бу мақсад йўлида биргаликда, ҳамжиҳатлик билан ҳаракат қилиш лозим.