БЕРЛИН, 27 июнь. /“Дунё” АА/. Германиянинг “diplo.news” ахборот-таҳлилий порталида “Ўзбекистон футбол дипломатиясини қандай амалга оширди?” сарлавҳали мақола эълон қилинди, деб хабар бермоқда “Дунё” АА мухбири.

Унда муаллиф Ўзбекистон миллий терма жамоасининг 2026 йилги футбол бўйича жаҳон чемпионатига илк бор йўл олганини нафақат спортдаги тарихий ютуқ, балки мамлакатнинг халқаро нуфузи ва дипломатик фаоллигини акс эттирувчи муҳим воқеа сифатида баҳолайди.

Шунингдек, материалда Берлиндаги Ўзбекистон элчихонаси боғида ташкил этилган жамоавий томоша тадбири оддий футбол трансляцияси эмаслиги таъкидланади. Қайд этилишича, мазкур тадбир мамлакатнинг спортдаги муваффақиятлари, халқаро ҳамкорлик салоҳияти ҳамда Германия билан изчил ривожланаётган шериклик муносабатларини намоён этувчи самарали майдон вазифасини ўтаган.

Мақолада элчи Дилшод Ахатовнинг тадбирдаги нутқига алоҳида эътибор қаратилган. Унда дипломат ГФР Федерал президенти Франк-Вальтер Штайнмайернинг Ўзбекистонга расмий ташрифи, ташриф якунлари бўйича Қўшма баёнот қабул қилингани ҳамда икки томонлама ҳамкорликни кенгайтиришга қаратилган қатор келишувларга эришилганини таъкидлагани қайд этилади.

Нашрда ташриф доирасида иқтисодий ҳамкорликка алоҳида урғу берилгани, жумладан, барқарор шаҳарсозлик, “Volkswagen” автомобилларини русумли автомобилларни тайёр йирик агрегатлар асосида йиғишни йўлга қўйиш, Андижонда “Rhenus” логистика марказини барпо этиш, маиший кимё маҳсулотлари ишлаб чиқариш, темир йўл соҳаси учун мутахассислар тайёрлаш ҳамда синов ва сертификатлаш марказларини очиш каби лойиҳалар тилга олинган.

Бундан ташқари муаллиф дипломат Тошкент халқаро инвестиция форуми натижаларига эътибор қаратиб, сўнгги йилларда Ўзбекистонга нисбатан халқаро инвестициявий қизиқиш сезиларли даражада ортиб бораётганини эътироф этган.

Умуман олганда, немис нашридаги мазкур мақола Ўзбекистон миллий терма жамоасининг жаҳон чемпионатидаги илк иштироки Германия жамоатчилиги ва эксперт доираларида катта қизиқиш уйғотганини, шунингдек, спорт, маданият ва дипломатияни уйғунлаштирган ҳолда мамлакат имижини мустаҳкамлашга хизмат қилганини кўрсатади.