МОСКВА, 5 май. /"Дунё"АА/. Россиянинг "Караван Инфо" ахборот агентлиги Бухоро вилоятининг сайёҳлик салоҳиятига бағишланган мақолани тарқатди, деб хабар беряпти "Дунё" АА мухбири.

Унда Бухорога келаётган сайёҳлар сони кундан кунга ошаётгани таъкидланган. "Уларни шаҳарнинг бой тарихий ва маданий объектлари, ўзига хос меъморчилиги фаол жалб қилаётир", – деб ёзган муаллиф.

Маълум қилинишича, жорий йилнинг биринчи чорагида Бухоро вилоятига Россиядан 9758 нафар сайёҳ келган. Сайёҳлар оқими бўйича иккинчи ўринни Хитой эгаллади. Етакчилар орасида Қозоғистон, Ҳиндистон, Япония ва Италия бор. Шунингдек, Бухорога Туркманистон, Франция, Америка Қўшма Штатлари, Эрон, Испания, Малайзия ва Индонезиядан ҳам кўплаб сайёҳлар келганини маълум қилинган.

"Бухоронинг бетакрор архитектураси ва маданий меросига мафтун бўлган кўплаб хорижлик меҳмонлар ушбу қадим кентни яна бир бор кўриш истагини билдирмоқда. 2025 йил якунига қадар Бухорога 2,2 миллиондан зиёд сайёҳ келиши кутилмоқда", – деб ёзган "Караван Инфо" АА.