МОСКВА, 1 июнь. /“Дунё” АА/. Россиянинг етакчи оммавий ахборот воситалари — “Ведомости” газетаси, “Интерфакс” ва “РИА Новости” ахборот агентликлари Ўзбекистон Президентининг Олий Евроосиё иқтисодий кенгаши йиғилишидаги иштироки ҳамда ўзбек-рус кўп томонлама ҳамкорлик алоқаларининг бугунги ҳолатига бағишланган туркум материалларни чоп этди, деб хабар бермоқда “Дунё” АА мухбири.

Россия Федерацияси  Президентининг матбуот котиби Дмитрий Песковнинг баёнотларига таяниб тарқатилган ушбу мақолаларда, расмий Москва Ўзбекистонни ўзининг ўта яқин ва ишончли стратегик шериги сифатида кўриши алоҳида урғуланган. Россия томони икки мамлакат ўртасидаги иқтисодий, савдо-инвестициявий ва чуқур тарихий илдизларга эга бўлган гуманитар соҳалардаги ҳамкорлик ривожини юқори баҳоламоқда.

Шунингдек, мақолаларда кўп томонлама интеграция жараёнлари, хусусан, Ўзбекистоннинг Евроосиё иқтисодий иттифоқи (ЕОИИ) билан кузатувчи давлат мақомидаги изчил алоқалари таҳлил қилинган.

Қайд этилишича, ЕОИИга аъзо барча давлатлар Тошкентнинг ушбу ташкилот билан ҳамкорликни кенгайтиришга қаратаётган эътиборини ниҳоятда ижобий қабул қилмоқда. Иттифоқ доирасидаги иқтисодий интеграция ҳар бир иштирокчи давлатнинг ялпи ички маҳсулоти (ЯИМ) ўсишига ва қўшимча иқтисодий дивидендлар олинишига хизмат қилувчи ўзаро манфаатли жараёндир.

Россиялик сиёсий кузатувчилар ва матбуот нашрлари икки давлат раҳбарларининг мунтазамлик касб этган сиёсий мулоқотларига тўхталар экан, жорий йилнинг 22 май куни бўлиб ўтган самарали телефон мулоқоти ҳамда Президент Шавкат Мирзиёевнинг 8 май куни Москва шаҳрига амалга оширган мазмунли ишчи ташрифини алоҳида эътироф этганлар.