АШХОБОД, 2 апрель. /«Дунё» АА/. Ашхобод шаҳрида Ўзбекистон элчиси Равшанбек Алимовнинг Туркманистон Вазирлар Маҳкамаси Раиси ўринбосари Батир Аннаев билан учрашуви бўлиб ўтди, деб хабар бермоқда «Дунё» АА мухбири.

Мулоқот чоғида томонлар икки давлат ўртасида транспорт-логистика ва коммуникациялар соҳасидаги ҳамкорликнинг долзарб масалаларини муҳокама қилдилар.

Сўнгги йилларда Ўзбекистон ва Туркманистон ўртасидаги савдо-иқтисодий муносабатларнинг ижобий динамикаси ва сезиларли фаоллашгани қайд этилди. Бунда транспорт инфратузилмасини янада ривожлантириш ҳамда юк ташувчилар учун қулай шароитлар яратиш муҳим аҳамиятга эга экани таъкидланди.

Томонлар Ўзбекистон ва Туркманистон ўртасида транспорт-транзит, логистика ва коммуникациялар соҳасида ҳамкорликнинг ривожи нафақат икки томонлама муносабатларни мустаҳкамлашга, балки минтақада транспорт йўлакларининг барқарорлиги ва самарадорлигини оширишга ҳам хизмат қилишини эътироф этдилар.