АШХОБОД, 20 январь. / “Дунё” АА/. Туркманистоннинг “News Central Asia” АА бош муҳаррири Тариқ Саидий “Дунё” АА учун Ўзбекистон Президенти раислигида бўлиб ўтган Ташқи ишлар вазирлиги ва хориждаги дипломатик ваколатхоналар фаолиятига бағишланган йиғилиш ҳақида фикр билдирди:

– Ўзбекистон чуқур ўзгаришлар даврига қадам қўймоқдаки, бу шунчаки сиёсатни ўзгартиришдан кўра кўпроқ нарсани талаб қилади. Улар миллий онгда туб бурилиш ясашни исташади. Президент Шавкат Мирзиёев 15 январь куни дипломатларга мурожаатида беқарор геосиёсий дунёда миллий манфаатларни қатъий ҳимоя қилиб, аниқ натижаларга эриша оладиган “янги авлод дипломатлари”ни яратишга чақирди.

Бу нафақат дипломатлар, балки бошқа соҳа раҳбарларидан тортиб, ҳудудлар аҳолисига ҳам даъватдир. Ҳақиқий муваффақиятга эришиш учун бутун тизим синхрон ўзгаришларни бошдан кечириши керак. Бунда ҳамма ушбу янги тамойилларга нафақат сўзма-сўз маънода, балки натижага йўналтирилган фаол руҳда амал қилади.

Бундай турдаги шарҳларда ушбу кенг кўламли ислоҳотнинг барча жиҳатларини кўриб чиқиш мумкин эмас. Аммо биз тезкор тузатиш энг долзарб бўлган аниқ соҳаларни кўрсатишимиз мумкин. Бу ўзгаришлар замирида иқтисодий шерикликка мутлақо янгича ёндашув бўлади.

Президент замонавий элчи инвестицияларни жалб қилиш, экспорт бозорларини очиш ва логистика йўлакларини ишга тушириш учун масъул бўлган давлат вакили эканини таъкидлади. Бунинг учун давлат, хусусий ва давлат-хусусий шаклларидаги бошқарув ва фармойиш берувчи тузилмалар ўртасида тўғридан-тўғри, юқори тезликдаги алоқаларни йўлга қўйиш зарур.

Бу – савдога алоқадор барча вазирликлар, вилоят ҳокимликларини ягона жипслашган кучга бирлаштирадиган яхлит тармоқ ташкил этиш, дегани. Бу ҳамкорлик қанчалик тез ва ишончли бўлса, яқинда имзоланган 160 миллиард долларлик савдо ва инвестиция шартномаларини мамлакатнинг сезиларли равнақига айлантириш шунчалик осон бўлади.

Бундан ташқари, дипломатиянинг янгиланган формати сунъий интеллектдан фаол фойдаланиш орқали илғор технологиялардан фойдаланиши керак. Ушбу ўтиш барча дипломатлардан сунъий интеллект соҳасида зарур тайёргарликни талаб қилади, уларга кенгайиб бораётган имкониятлардан қандай фойдаланиш ва улар учун ўрнатилган қатъий асосий самарадорлик кўрсаткичларига риоя қилишни ўргатади.

Ўзбекистон ўз воситаларини модернизация қилаётган бир пайтда, сиёсатни амалга оширишда инсон омилини эътибордан четда қолдириб бўлмайди. Президент “кабинет дипломатияси”га ишора қилиб, унинг ўрнига жойларда ишлаш ва тўғридан-тўғри мулоқотга ўтишга чақирди.

Бугунги кунда Ўзбекистоннинг дипломатик ваколатхоналари зиммасига хориждаги ўз фуқароларининг ҳуқуқларини ҳимоя қилиш, уларнинг қонуний, юқори даромадли иш ўринларига эга бўлишини таъминлашдек эзгу вазифа юклатилган.

Гап жаҳоннинг 100 та етакчи университети билан ҳамкорлик қилиш ёки фермерларнинг харажатларини камайтириш учун транспорт йўналишларини диверсификация қилиш ҳақида кетяптими, бундан қатъи назар, мақсад инсонга йўналтирилган ташқи сиёсатдир.

Ташқи сиёсат концепциясининг янгиланиши хавфсизлик ва иқлим соҳасидаги узоқ муддатли стратегик мақсадларни акс эттириб, Ўзбекистоннинг глобал тинчлик ва дипломатия маркази сифатидаги нуфузини мустаҳкамлайди.

Ўзбекистон халқаро ҳамжамиятга бизнес учун очиқлиги, натижаларга интилаётгани ва ягона, келишилган мақсад билан олдинга ҳаракат қилаётганини билдиради.