ЛОНДОН, 6 апрель. /“Дунё” АА/. Ўзбекистоннинг Буюк Британиядаги элчихонасида нуфузли “Saba Productions” медиа компанияси вакили Фиона Кашли билан учрашув бўлиб ўтди, деб хабар бермоқда “Дунё” АА мухбири.

Мулоқот чоғида буюк қомусий олим ва файласуф Абу Али ибн Сино ҳаёти ҳамда илмий меросига бағишланган янги ҳужжатли фильмни суратга олиш масалалари муҳокама қилинди. Ушбу лойиҳа тадбиркор Эҳсон Раҳбар ҳомийлигида амалга оширилмоқда.

Учрашув давомида элчихона вакиллари томонидан бўлажак фильмда Абу Али Ибн Сино сиймосини талқин қилишда тарихий фактларни ўзгартирмасдан, асл ҳолича талқин этиш муҳимлиги таъкидланди. Хусусан, алломани Ғарбда илм-фан ва тиббиёт ривожига улкан таъсир кўрсатган, бутун инсониятга тегишли бўлган Буюк Шарқ олими сифатида намоён этиш зарурлиги қайд этилди.

Фиона Кашлининг сўзларига кўра, ижодий гуруҳ 3–5 апрель кунлари Истанбул шаҳрида суратга олиш ишларини якунлаб, 6 апрель куни Ўзбекистонга етиб келади. Асосий тасвирга тушириш жараёнлари 7–12 апрель кунлари Бухоро вилоятида — аллома туғилиб ўсган заминда бўлиб ўтиши режалаштирилган.

Мазкур лойиҳа Ўзбекистоннинг бой тарихий ва интеллектуал меросини халқаро миқёсда тарғиб қилиш, Иккинчи Ренессанс даври вакилларининг жаҳон цивилизациясига қўшган ҳиссасини кенг ёритишга хизмат қилади.