ПУСАН, 9 август. /“Дунё” АА/. Корея Республикаси Пусан шаҳри ҳокими Чун Жэ-су Ўзбекистон Мустақиллигининг 35 йиллиги арафасида “Дунё” АА орқали юртдошларимизга ўзининг самимий табриги ва эзгу тилакларини йўллади:

– Ассалому алайкум! Мен Пусан шаҳри аҳолиси номидан Ўзбекистон халқини мамлакат мустақиллигининг 35 йиллиги билан чин қалбимдан муборакбод этаман.

Ўтган 35 йил давомида Ўзбекистон тинимсиз изланиш ва инновацион тараққиёт йўли орқали Марказий Осиёнинг муҳим давлатларидан бирига айланди. Буюк Ипак йўлидек шонли тарихга таянган ҳолда жадал тараққиёт сари интилаётган Ўзбекистон халқининг матонати ва салоҳиятига чуқур ҳурмат билдираман.

2023 йилда Евроосиё цивилизацияси марказларидан бири бўлган Самарқанд шаҳри билан дўстлик ва ҳамкорлик муносабатларини ўрнатганимиздан буён биз ўзаро ишонч ва мустаҳкам дўстликка асосланган алоқаларни ривожлантириб келмоқдамиз.

Шу вақт ичида юқори даражадаги қатор учрашувлар, маданий алмашинув тадбирлари ўтказилди. Икки давлат ёшлари ҳам ўзаро ташрифларни амалга ошириб, келажакдаги янада улкан ҳамкорлик учун пойдевор яратмоқда.

Пусан ва Тошкент шаҳарлари ўртасида шерикликнинг янги йўналишлари очилмоқда. Яқин кунларда Пусан шаҳрининг "Евроосиё экспедицияси" делегацияси Тошкент шаҳрига ташриф буюриб, шаҳарларимиз ўртасидаги алоқаларни янада ривожлантириш учун мустаҳкам пойдевор яратиши кутилмоқда.

Шаҳарларимиз ўртасидаги бундай ҳамкорлик Жанубий Корея ва Ўзбекистон ўртасидаги дўстликни янада мустаҳкамлаш, ўзаро фаровонлик ва тараққиётни таъминлашда ишончли таянч бўлиб хизмат қилиши, шубҳасиз.

Икки мамлакат ўртасидаги дўстлик абадий бўлишини, Ўзбекистоннинг тараққиёти ва равнақи янада юксалишини тилайман. Ўзбекистон халқини яна бир бор Мустақилликнинг 35 йиллиги билан самимий қутлайман!