АБУ-ДАБИ, 8 ноябрь. /“Дунё” АА/. Ўзбекистон элчиси Умид Шадиев БААнинг йирик девелоперлик компанияларидан бири бўлган “Reportage Properties” раиси Ареф Аль Хури ва бош директори Андреа Нучера билан учрашув ўтказди, деб хабар бермоқда “Дунё” АА мухбири.

Музокаралар чоғида компания вакилларига Ўзбекистонда инвестиция муҳитини яхшилаш, қурилиш соҳаси ва кўчмас мулк бозорини ривожлантиришга қаратилган ислоҳотлар, шунингдек, Янги Тошкентда хорижий инвесторлар учун яратилган имкониятлар ҳақида батафсил маълумот берилди.

“Reportage Properties” раҳбарияти Ўзбекистон кўчмас мулк бозорининг ривожланиш динамикасини ижобий баҳолаб, мамлакатнинг инвестициявий салоҳиятига катта қизиқиш билдирди.

Шунингдек, томонларга Янги Тошкентда амалга оширилиши режалаштирилган истиқболли инвестиция лойиҳалари тақдим этилди. Учрашувда компаниянинг мазкур лойиҳаларда иштирок этиши, илғор қурилиш ечимларини жорий этиш ва ўзаро манфаатли ҳамкорликни ривожлантириш масалалари муҳокама қилинди.

Якунда инвестициявий имкониятларни ўрганиш ва келгусидаги шериклик истиқболларини ишлаб чиқиш бўйича келишиб олинди.