ЗАГРЕБ, 19 январь. /“Дунё” АА/. Ўзбекистоннинг Будапешт шаҳридаги элчихонаси томонидан хорижда меҳнат фаолиятини амалга ошираётган ватандошларнинг ҳақ-ҳуқуқлари ва қонуний манфаатларини ҳимоя қилиш бўйича мунтазам равишда ишлар олиб борилмоқда, деб хабар қилмоқда “Дунё” АА мухбири.

Хусусан, яқинда Ўзбекистон фуқаролари А.А. ва Р.И. Хорватиядан Ватанга қайтишда ёрдам сўраб, элчихонанинг консуллик бўлимига мурожаат қилган.

Мурожаатчилар билан мулоқот жараёнида маълум бўлдики, уларни хусусий бандлик агентлиги фирибгарлик йўли билан алдаган. Ишга жойлашиш мақсадида чет элга келган ҳамюртлар фирибгарлар тузоғига тушганини кейин англаб етган. Натижада, ишсиз, пулсиз оғир аҳволда қолиб кетган. Шу боис, улар Ўзбекистонга қайтиши учун авиачипта сотиб олишда молиявий ёрдам сўраб мурожаат қилган.

Юзага келган вазиятни инобатга олган ҳолда элчихона томонидан Ўзбекистон Ташқи меҳнат миграцияси агентлиги билан ишчи алоқалар ўрнатилди.

Ўтказилган суриштирув ва келишувлар натижасида Ўзбекистон Меҳнат мигрантларини қўллаб-қувватлаш ва уларга кўмаклашиш жамғармаси маблағлари ҳисобидан мурожаатчиларга авиачипталар сотиб олиниб, уларнинг ватанга қайтиши учун кўмак берилди.