БРЮССЕЛЬ, 8 июль. /“Дунё” АА/. Европа парламентининг ўнлаб депутатлари АҚШ терма жамоаси ҳужумчиси Фоларин Балогуннинг дисквалификацияси бекор қилинганидан сўнг ФИФА президенти Жанни Инфантинога нисбатан суриштирув ўтказишни талаб қилди, деб хабар бермоқда “Дунё” АА мухбири “AP” маълумотига таяниб.

Европалик қонун чиқарувчиларнинг фикрича, қарор АҚШ президенти Дональд Трампнинг аралашувидан сўнг сиёсий босим остида қабул қилинган бўлиши мумкин.

Депутатлар Европа Иттифоқи мамлакатлари футбол ассоциацияларига ФИФАнинг ахлоқ қўмитасига мурожаат қилиш ҳамда Жанни Инфантинонинг роли, қарор қабул қилиш жараёни ва эҳтимолий сиёсий аралашувни расман текширишга эришишга ундовчи хатни юбормоқда. Ҳозирги кунга келиб мурожаатни 35 нафар депутат қўллаб-қувватлаган.

Ушбу ҳолатга 2 июль куни жаҳон чемпионатининг АҚШнинг Босния ва Герцеговинага қарши ўйинида, қизил карточка олган футболчи Фоларин Балогун билан боғлиқ вазият сабаб бўлди. ФИФА қоидаларига кўра, бу кейинги учрашувни автоматик равишда ўтказиб юборишни англатади. Бироқ, АҚШ–Бельгия ўйини олдидан ФИФАнинг интизом қўмитаси кутилмаганда Фоларин Балогуннинг дисквалификациясини бекор қилган.

Депутатларнинг таъкидлашича, бу жаҳон чемпионатлари тарихида турнир давомида майдондан четлатилган футболчининг кейинги ўйин учун дисквалификацияси бекор қилинган биринчи ҳолатдир.

Қарор қабул қилинишидан бироз аввал, Дональд Трампнинг Жанни Инфантино билан шахсан боғлангани алоҳида эътиборни тортди. Кейинроқ, Америка етакчиси ушбу суҳбатни тасдиқлаб, ФИФАдан эпизодни яна бир бор кўриб чиқишни сўраганини маълум қилди.

“Қизил карточка даҳшатли эди”, – деди АҚШ президенти. Унинг сўзларига кўра, у аниқ бир қарорни талаб қилмаган ва Жанни Инфантинога нима қилиш кераклигини айта олмасди, бироқ дисквалификация турнирга катта доғ тушириши мумкин деб ҳисоблаган.

ФИФА қарор фақат интизом қўмитаси томонидан қабул қилинганини таъкидлади. Жанни Инфантино Дональд Трампга: “Масала ташкилотнинг мустақил суд органлари ваколатига киради”, деб айтганини билдирди.

Бироқ Европада бу изоҳларга ишонишмади. УЕФА ФИФА қарорини “мисли кўрилмаган, тушунарсиз ва асоссиз” деб атади.

Европалик депутатлар жаҳон чемпионати давомида қизил карточкадан кейинги дисквалификация қоидасининг ўзгартирилиши “шармандалик ва адолатнинг бузилиши” эканини таъкидлади. Уларнинг фикрича, ФИФА яна бир бор АҚШ маъмурияти талабларига ён босган.

Парламент аъзолари дисквалификацияни бекор қилиш ҳолатларидан ташқари, сиёсий бетарафлик тамойилининг бошқа эҳтимолий бузилишларини, жумладан, Дональд Трампга ФИФА томонидан таъсис этилган “Тинчлик мукофоти”нинг топширилишини ҳам текширишни таклиф қилмоқда.

АҚШга қарши ўйин олдидан Бельгия терма жамоаси бош мураббийи Руди Гарсия ФИФАнинг қизил карточкани бекор қилиш ҳақидаги қарорига киноя билан изоҳ берди: “Бу жаҳон чемпионатида 5 июль 1 апрель – Ҳазил куни каби эканини билмаган эканман”. Америкалик ўйинчининг ўйинга тушишига қарамай, АҚШ терма жамоаси Бельгияга 1:4 ҳисобида имкониятни бой бериб, жаҳон чемпионатидаги иштирокини якунлади.