БИШКЕК, 30 июль. /“Дунё” АА/. Қирғизистоннинг “Слово Кыргызстана” газетасида “Ўзбекистон - Қирғизистон: чегарадош қўшничиликдан узоқ муддатли иқтисодий кооперация сари” сарлавҳали таҳлилий мақола чоп этилди, деб хабар бермоқда “Дунё” АА мухбири.

Мақолада таъкидланганидек, сўнгги йилларда Ўзбекистон ва Қирғизистон ўртасидаги муносабатлар Марказий Осиёдаги минтақавий ҳамкорликнинг асосий устунларидан бирига айланди. Умумий чегара, тарихий яқинлик ва давлат раҳбарларининг мунтазам мулоқоти савдо, транспорт, энергетика, саноат ҳамда қишлоқ хўжалиги соҳаларидаги мустаҳкам шерикликка замин яратмоқда. Бу икки томонлама кун тартибини оддий қўшничилик доирасидан олиб чиқиб, комплекс иқтисодий ҳамкорлик хусусиятини бахш этмоқда.

Жорий йилнинг 22-23 июнь кунлари Чўлпон ота шаҳрида бўлиб ўтган Ҳукуматлараро комиссиянинг 12-мажлиси ва соҳавий вазирликларнинг учрашувлари савдо-инвестициявий алоқаларни жадаллаштиришда муҳим ўрин тутади. Шунингдек, ҳудудлараро тўғридан-тўғри алоқаларни мустаҳкамлаш мақсадида Ўзбекистонда икки мамлакат Ҳудудларининг биринчи форумини ўтказиш режалаштирилган.

Иқтисодий кўрсаткичлар ҳам муносабатларнинг юқори динамикасини кўрсатмоқда. 2025 йил якунларига кўра, ўзаро савдо айланмаси қарийб 1,2 миллиард АШҚ долларини ташкил этиб, 36,4 фоизга ошди. 2026 йилнинг январь-май ойларида эса бу кўрсаткич 468,8 миллион долларни (+43,9%) ташкил этди. Томонлар 2024–2030 йилларга мўлжалланган ўзаро савдо ҳажмини ошириш дастурини изчил амалга оширмоқда.

Мақолада саноат кооперацияси ва инвестициявий ҳамкорлик алоҳида эътироф этилган. Бугунги кунда Ўзбекистонда қирғиз капитали иштирокидаги 450 та, Қирғизистонда эса ўзбек капиталига эга 85 та корхона фаолият юритмоқда. Чуй вилоятида “Onix”, “Captiva”, “Damas”, “Cobalt”, “Tahoe” ва “Tracker” автомобилларини ишлаб чиқариш йўлга қўйилди. Бундан ташқари, геология, фармацевтика, енгил саноат ва тўқимачилик соҳаларида қўшма лойиҳалар ҳаётга татбиқ этилмоқда.

Стратегик йўналишлар қаторида энергетика ва транспорт соҳалари ҳам бор. Хусусан, “Қамбарота ГЭС-1” қурилиши бўйича келишувларни жадаллаштириш ҳамда 2026–2028 йилларга мўлжалланган транспорт ва логистика бўйича қўшма дастурни тайёрлаш устида иш олиб борилмоқда. Ушбу ташаббусларни молиялаштиришда Ўзбекистон–Қирғизистон тараққиёт жамғармаси муҳим васила бўлиб хизмат қилмоқда.

Умуман олганда, мақола муаллифи таъкидлаганидек, Ўзбекистон ва Қирғизистон муносабатлари нафақат алоҳида келишувлар тўпламини, балки узоқ муддатли ва барқарор шерикликнинг яхлит тизимини шакллантирмоқда.