МОСКВА, 22 август. /“Дунё” АА/. Россиянинг етакчи “Интерфакс” ахборот агентлигида Ўзбекистон кичик бизнес соҳасида амалга оширилаётган чора-тадбирларга бағишланган мақола эълон қилинди, деб хабар бермоқда “Дунё” АА мухбири.

Нашрда маълум қилинишича, Ўзбекистон Президенти тадбиркорлар билан ўтказган очиқ мулоқотда 2029 йилга қадар кичик бизнес субъектлари фаолиятини текширишга уч йиллик мораторий эълон қилди.

Давлат раҳбари тадбиркорларни босим ўтказиш орқали эмас, балки ўқитиш ва ўргатиш орқали қўллаб-қувватлаш муҳимлигини алоҳида таъкидлаган. Хабарда келтирилишича, 5 мингга яқин тадбиркорнинг ярмидан кўпи йилига 2–3 марта, 21 фоизи эса 4 мартадан ортиқ солиқ текширувларига дуч келган.

Бундан ташқари, ўрта ва йирик корхоналар учун ихтиёрий профилактик аудит тизими жорий этилади. Унга кўра, аниқланган камчиликлар бартараф этилган тақдирда, жарималар ундирилмайди, такрорий текширувлар ўтказиш учун эса Бизнес-омбудсман розилиги талаб этилади.

Мақолада қайд этилишича, маъмурий босимни камайтириш мамлакат раҳбарияти учун устувор вазифадир. Сўнгги йилларда мамлакатда солиқ юки 12 фоизгача қисқартирилди, яширин иқтисодиёт улуши эса сезиларли даражада камайди.

Ўзбекистон Президенти Матбуот хизмати архивидан олинган сурат