МОСКВА, 28 январь. /“Дунё” АА/. Россиянинг “Караван инфо” ахборот агентлигида Ўзбекистоннинг коррупцияга қарши курашдаги янги ва муросасиз стратегиясига бағишланган таҳлилий мақола эълон қилинди, деб хабар бермоқда “Дунё” АА мухбири.

 Мақолада Президент Шавкат Мирзиёевнинг 2025 йил 30 декабрдаги Парламент ва халққа йўллаган Мурожаатномаси мамлакатнинг яқин йиллардаги ривожланиш йўналишини белгилаб берувчи туб бурилиш нуқтаси бўлгани қайд этилган.

Агентликнинг таъкидлашича, давлат раҳбарининг нутқида коррупцияга қарши кураш мавзуси ўзининг кескинлиги ва қатъияти билан марказий ўринни эгаллаб, бутун давлат аппарати ҳамда жамият учун жиддий огоҳлантириш сигнали вазифасини ўтади.

Мақолада сиёсий ироданинг амалий тасдиғи сифатида 2025 йил 30 декабрда имзоланган Президент фармони келтирилади. Ушбу ҳужжат асосида мамлакатда коррупцияга қарши курашиш тизимини тубдан ислоҳ қилиб, асосий эътиборни шунчаки жазолашдан тизимли хатарларни бошқариш ва барвақт олдини олишга қаратади.

Янги тизим доирасида бошқарувнинг унификацияланган стандартлари жорий этилиши, рақамли платформалар орқали инсон омилини камайтириш ва ахборот шаффофлигини таъминлаш, коррупция ҳақида хабар берган фуқароларни ҳимоя қилиш ва рағбатлантиришнинг ҳуқуқий механизмлари мустаҳкамланади.