ИСЛОМОБОД, 28 апрель. /“Дунё” АА/. Покистоннинг оммабоп “Infora News” нашрида “Ўзбекистоннинг иқтисодий ютуқлари: кучли ўсиш кўрсатгичлари янги ривожланиш даврини бошлаб берди” сарлавҳали мақола эълон қилинди, деб хабар бермоқда “Дунё” мухбири.

Ўзбекистон Президенти ҳузуридаги Стратегик ва минтақалараро тадқиқотлар институти (СМТИ) директорининг биринчи ўринбосари Акрамжон Неъматов муаллифлигидаги ушбу мақолада шу йил 24 апрель куни Ўзбекистон Президенти раислигида ўтказилган йиғилиш натижалари шарҳланган.

Шарҳда ёзилишича, 2026 йил биринчи чорагида мамлакатнинг ижтимоий-иқтисодий ривожланиш натижалари кучли ўсиш кўрсатгичларини намоён қилганини кўрсатди. Ўзбекистон нафақат глобал беқарорликка мослаша олди, балки ташқи иқтисодий хавфларга қарши мустаҳкам ички иммунитетни ҳам шакллантирди.

Эришилган кўрсаткичлар миллий иқтисодиётнинг сифат жиҳатидан янги, динамик ривожланиш босқичига чиққанини кўрсатади. Жаҳон бозорларидаги ўзгарувчанлик, глобал логистика занжирларининг узилиши ва инфляцион босим кучайишига қарамай, Ўзбекистон ЯИМни 8,7 фоизга оширишга эришди. Бу ўтган йилнинг шу давридаги 6,8 фоиз кўрсаткичдан анча юқори.

Бундай сезиларли ўсиш Ўзбекистон Президенти Шавкат Мирзиёев томонидан амалга оширилаётган, жамият ҳаётининг барча соҳаларини тубдан ўзгартиришга қаратилган пухта ўйланган ва изчил стратегиянинг бевосита натижасидир.

Муаллифнинг фикрича, мамлакат раҳбариятининг катта ҳиссаси тадбиркорликни мисли кўрилмаган даражада молиявий қўллаб-қувватлашда намоён бўлди. 2026 йилда банк тизими орқали бу мақсадлар учун 140 триллион сўм йўналтирилди. Бу ўтган йилга нисбатан 30 фоизга кўп. Маҳаллаларга манзилли ёрдам эса биринчи чоракнинг ўзидаёқ 3,6 триллион сўмни ташкил этди ва 25 фоиз ўсишни кўрсатди. Бу маҳаллий бюджетларга қўшимча равишда 2,2 триллион сўм даромад шакллантириш имконини берди.

Таҳлил жараёнида давлат раҳбари истиқболларни аниқ белгилаб берди. Асосий вазифалардан бири сифатида меҳнат унумдорлигини кескин ошириш белгиланган бўлиб, у замонавий технологиялар ва бошқарув стандартларини жорий этиш ҳисобига камида 10–15 фоизга ўсиши лозим. Давлат хомашё экспорт қилувчи моделдан тўлиқ воз кечиб, юқори технологияли минтақавий қўшилган қиймат занжирларини яратишни мақсад қилган ва бу йўлда 40 дан ортиқ жаҳон брендларини стратегик ҳамкорликка жалб этмоқда.

Шунингдек, нашрда биринчи чорак давомида жалб қилинган хорижий инвестициялар ҳажми рекорд даражада ­– 13,7 миллиард АҚШ долларини ташкил этгани, бу ўтган йилга нисбатан 1,6 баробар кўп экани қайд этилган.