ТЕҲРОН, 20 апрель. /“Дунё” АА/. Эрон ҳукумати Вашингтон мамлакатнинг Ҳурмуз бўғозидаги портларини блокада қилишда давом этаётган бир пайтда Покистонда АҚШ билан музокараларда иштирок этишни режалаштирмаяпти, деб хабар бермоқда “Дунё” АА мухбири “Reuters” агентлигига таяниб.

Эслатиб ўтамиз, Вашингтон ва Теҳрон ўртасидаги музокараларнинг биринчи босқичи 11 ва 12 апрель кунлари Покистон пойтахти Исломободда бўлиб ўтган ва натижасиз якунланган эди.

Қайд этилишича, ушбу учрашувдан сўнг томонлар воситачилар орқали хабар алмашишни давом эттирган, бироқ Эрон томони нуқтаи назаридан, мулоқот Қўшма Штатларнинг “ҳаддан ташқари талаблари ва амбициялари” туфайли боши берк кўчага кириб қолган.

АҚШ президенти Дональд Трамп 20 апрель куни Исломободда Эрон билан музокараларнинг янги босқичига Америка делегацияси келишини ижтимоий тармоқларда эълон қилди.

Унинг сўзларига кўра, Оқ уй Теҳронга “ҳалол ва оқилона келишув” таклиф қилмоқда. “Умид қиламанки, улар уни қабул қилишади, чунки акс ҳолда АҚШ Эрондаги ҳар бир электр станцияси ва ҳар бир кўприкни ишдан чиқаради”, – дея қўшимча қилди АҚШ президенти.

У, шунингдек, дам олиш кунлари АҚШ ҳарбий-денгиз кучлари Вашингтон томонидан ўрнатилган Эрон портларининг денгиз блокадасини четлаб ўтишга уринган Эрон юк кемасини Ўмон кўрфазида ўққа тутиб, қўлга олганини таъкидлади.

Эроннинг бирлашган ҳарбий қўмондонлиги АҚШни сулҳни бузганликда айблаб, тез орада “денгиз ва қуролли талончилик” ҳаракатига жавоб беришга ваъда берди. “Tasnim” ахборот агентлигининг хабар беришича, ҳозирда Эрон Покистонга музокаралар олиб бориш учун делегация юборишга қарор қилмаган, чунки “АҚШнинг денгиз блокадаси мавжуд”.

Эрон томонидан қўллаб-қувватланадиган Яман ҳусийлари, агар АҚШ Президенти Дональд Трамп “тинчликка тўсқинлик қилувчи барча ҳаракатларни” тўхтатмаса, Боб ал-Мандеб бўғозини ёпиши мумкин, деди ҳусийлар ҳукумати ташқи ишлар вазири ўринбосари Ҳусайн ал-Эззи Х ижтимоий тармоғида.

“AFP” агентлиги сурати