ДУШАНБЕ, 18 октябрь. /“Дунё” АА/. Тожикистоннинг Сўғд вилояти Ўзбек маънавияти ва маърифат маркази раҳбари ўринбосари, Ўзбекистоннинг “Дўстлик” ордени соҳиби, журналист Озод Мелибоев “Дунё” ААга берган интервьюсида Ўзбекистон халқини 21 октябрь – Ўзбек тили байрами куни билан табриклади:

– Бугунги глобаллашув шароитида ҳар биримиз кўплаб жаҳон тилларини ўрганамиз ва уларда сўзлашамиз. Бу тиллар биз учун мулоқот воситаси бўлиб хизмат қилади. Шу билан бирга, биз фойдаланадиган ва гаплашадиган тиллар орасида алоҳида ўрин эгаллайдиган битта тил бор. Бу тил шунчаки мулоқот воситаси эмас. У бизни миллий маънавиятимиз билан бевосита боғлайди.

Айнан шу тил миллий маънавиятимизнинг энг асосий устунларидан биридир. Шубҳасиз, бу бизнинг она тилимиздир. Мавлоно Жалолиддин Румий шундай деган эди: “Биз денгиз фарзандимиз, бизга денгиз макон, қайтамиз ул баҳрга, биз унданмиз ҳар қачон. Бу жаҳон тупроғидан кўтарилган бир булут, яна ўз асли томон ёғар ёмғир, бегумон”.

Яъни, тасаввур қилинг шу дарёдан ажралиб чиққан томчи осмонга кўтарилади, у ердан ёмғир бўлиб ерга ёғади, дарахтлар ва тупроққа сингиди ҳамда бир доирани босиб ўтиб, яна дарёга қайтади.

Шу маънода, дунёнинг турли бурчакларида яшаётган биз – ўзбеклар ҳам ўзбек тили маркази бўлган Ўзбекистондан узилиб қолишни истамаймиз. Миллий маънавиятимиз маркази бўлган Ўзбекистонда содир бўлаётган воқеалар доимо эътиборимиз марказида турибди.

Мен бугунги авлодимиз олдида жуда муҳим вазифа турганига ишонаман. Ўзбекистон халқ шоири Усмон Азимнинг сўзлари билан айтганда:“ Мен айтдимки, сен қўшиғимнинг моҳиятисан, мен айтдимки, сен юрагимнинг ўзагисан. Сен отамдан қолган меросдирсан,сен фарзандим олдидаги бурчимсан”.

Она тилимизни қорачиқдек асраб-авайлаш ва уни келажак авлодларга етказиш масъулияти ҳам зиммамиздадир.

Она тили ҳақида гап кетганда, Ўзбекистон Қаҳрамони, Ўзбекистон халқ шоири Абдулла Орипов жуда гўзал тарзда шундай деган эди: “Она тилим, сен бор экансан, мен, шубҳасиз, булбул сайрашини шеърга кўчираман. Сен йўқ бўлиб кетган кунда эса, мен ҳам, шубҳасиз, тўтиқушга айланиб қоламан”.

Ҳар биримизга ўз она тилимизда булбул сайрашини тинглаш насиб этсин ва ҳеч биримиз тўтиқуш ҳолида қолмайлик.

Фурсатдан фойдаланиб, барча ватандошларимизни Ўзбек тили байрами билан чин қалбдан муборакбод этаман. Байрамингиз муборак бўлсин, азиз дўстлар!