ИСЛОМОБОД, 26 май. /“Дунё” АА/. Покистоннинг етакчи оммавий ахборот воситалари футбол бўйича Ўзбекистон миллий терма жамоасининг АҚШ, Мексика ва Канада яшил майдонларида бўлиб ўтадиган жаҳон чемпионатига сўнгги тайёргарлик жараёнини кенг ёритмоқда, деб хабар бермоқда “Дунё” АА мухбири.

Хусусан, ушбу мамлакатнинг етакчи босма нашрларидан бири “Daily Spokesman” газетасида Президент Шавкат Мирзиёев иштирокида футбол бўйича Ўзбекистон миллий терма жамоасини 2026 йилги жаҳон чемпионатига кузатиш маросими бўлиб ўтгани ҳақида мақолани эълон қилинди.

 Мақолада Ўзбекистон Президенти стадионда тўпланган юртдошларимиз, футбол мухлислари, миллий терма жамоа аъзолари, мураббийлар штаби ва спорт жамоатчилиги вакилларини катта футбол байрами билан табриклагани қайд этилган.

 Давлат раҳбари бу йил ўзбек футболи учун муҳим тарихий йил бўлгани, миллий терма жамоа АҚШ, Мексика ва Канада майдонларида ўтадиган жаҳон чемпионатига катта ишонч ва эзгу тилаклар билан кузатилаётганини таъкидлаган.

 “Футболчиларимизни Ўзбекистон тарихида янги саҳифа очган замонамиз қаҳрамонлари деб айтсак арзийди. Улар халқимизга олам-олам қувонч бағишлади”, – дея Ўзбекистон Президенти сўзларидан иқтибос келтирилган мақолада.

Ўзбекистон етакчиси жаҳон чемпионатида осон ўйин бўлмаслиги, миллий терма жамоа гуруҳ босқичида Португалия, Колумбия ва Конго каби кучли рақибларга қарши майдонга тушишини таъкидлади. Шу билан бирга, ўзбек футболчилар аллақачон тарих яратгани, энди улар муҳим учрашувларда ортиқча босимсиз, бор куч-ғайрати билан Ватан шарафини муносиб ҳимоя қилиши зарурлиги қайд этган.

Нашрда ёзилганидек, мундиаль ўйинларида фан-клублар, минглаб футбол мухлислари ва Америкадаги ватандошларимиз стадионларда Ўзбекистон миллий терма жамоасини қўллаб-қувватлайди.

“Daily Spokesman”да футболчиларни жаҳон чемпионатига кузатиш маросими давомида катта концерт дастури намойиш этилгани, тадбир якунида миллий терма жамоа аъзолари иштирокида назорат учрашуви бўлиб ўтгани ҳам ёритилган.

 “2026 йилги ФИФА Жаҳон чемпионати 11 июндан 19 июлгача АҚШ, Канада ва Мексикада майдонларида бўлиб ўтади. Ўзбекистон Португалия, Конго ва Колумбия билан бирга “К” гуруҳидан ўрин олган”, – дейилган материал якунида.