БРЮССЕЛЬ, 21 октябрь. /“Дунё” АА/. Ўзбек тили байрами муносабати билан Марказий Осиё ва туркий мамлакатлар тарихи ва маданияти бўйича бельгиялик эксперт Пьер Бастен “Дунё” ахборот агентлигига берган интервьюсида халқимизни 21 октябрь – Ўзбек тили байрами куни билан табриклади:

– 21 октябрь – Ўзбек тили байрами куни билан барча ўзбекистонликларни самимий табриклайман.

Туркий тиллар бўйича мутахассис сифатида ўзбек тилини нафақат бой тарих ва маданий меросга эга, балки бутун туркий тиллар оиласини ўрганишда алоҳида аҳамият касб этадиган муҳим тил деб ҳисоблайман.

Ўзбек тилида қирғиз, қозоқ, татар, туркман, озарбайжон ва турк тиллари билан муштарак бўлган кўплаб лингвистик хусусиятларни учратиш мумкин. Бу уни туркий тилларнинг ўзаро боғлиқлиги ва тарихий тараққиётини англашда муҳим воситага айлантиради.

Айниқса, туркий тилларнинг тарихий илдизлари Марказий Осиё билан чамбарчас боғлиқ эканини инобатга олсак, ўзбек тилини ўрганиш ушбу тиллар тарихи, ривожланиши ва ўзига хос жиҳатларини янада чуқурроқ тушуниш имконини беради.

Бельгия, Франция ва бошқа Европа мамлакатларида ўзбек тилини университетлар даражасида ўқитиш, мунтазам тил курсларини ташкил этиш ҳамда уни ўрганиш имкониятларини кенгайтириш муҳим, деб биламан.

Барча ўзбек тили ихлосмандларини ушбу байрам билан муборакбод этаман ҳамда ўзбек тилининг халқаро нуфузи янада юксалиб, уни хорижий мамлакатларда ўрганиш ва ўқитиш борасида янги имкониятлар яратилишига тилакдошман.