МАНИЛА, 6 июль. /“Дунё” АА/. Филиппин Сенати мамлакат вице-президенти Сара Дутертега нисбатан импичмент суди сифатида ишни кўриб чиқишга киришди, деб хабар бермоқда “Дунё” АА мухбири “The Associated Press” агентлигига таяниб.

Суд жараёни Дутерте оиласи ва Филиппин президенти кичик Фердинанд Маркос ўртасидаги сиёсий қарама-қаршилик фонида кечмоқда. Вице-президент тарафдорлари ва мухолифларнинг намойишлари кутилаётгани сабабли, Сенат биноси атрофида хавфсизликни таъминлаш учун оммавий тартибсизликларга қарши кураш бўлинмалари ҳам жалб этилган 6 мингдан ортиқ полиция ходими сафарбар қилинди.

Сара Дутерте давлат маблағларини мақсадсиз сарфлаш, ноқонуний мол-мулк орттириш, мансабдор шахсларга пора бериш ҳамда президент ва унинг рафиқаси шаънига оммавий таҳдид қилишда айбланмоқда. Вице-президент барча айбловларни рад этган.

Агар у айбдор деб топилса, умрбод давлат лавозимларини эгаллаш ҳуқуқидан маҳрум этилиши мумкин. Бу эса унинг 2028 йилги президентлик сайловларида қатнашиш режаларини хавф остига қўяди.

Айблов ҳукмини чиқариш учун сенаторларнинг камида учдан икки қисми овоз бериши талаб этилади. Сиёсатшуносларнинг фикрича, ҳозирги босқичда томонларнинг имкониятлари деярли тенг. Февраль ойида Қуйи палатанинг 215 нафардан ортиқ аъзоси унга қарши шикоятни имзолаб, Сенатга петиция йўллаган эди.

Кузатувчилар бу жараённи мамлакатнинг икки йирик сиёсий сулоласи ўртасида давом этаётган сиёсий зиддиятнинг бир қисми сифатида баҳоламоқда. 2022 йилги сайловларда Сара Дутерте ва кичик Фердинанд Маркос ягона сиёсий тандем сифатида иштирок этган, бироқ кейинчалик уларнинг иттифоқи парчаланиб кетган эди. Ҳозирги вице-президентнинг отаси, инсониятга қарши жиноятларда айбланиб, Гаагада суд жараёнини кутаётган собиқ президент Родриго Дутертенинг ҳибсга олиниши муносабатларга қўшимча кескинлик бағишлади.

Жараён 92 кун давом этиши кутилмоқда. Шундан сўнг, сенаторлар қўйилган айбловларнинг ҳар бири бўйича овоз беради. Гарчи Филиппинда импичмент тартиб-таомиллари аввал ҳам ўтказилган бўлса-да, шу вақтга қадар бирорта ҳам юқори мартабали сиёсатчи ушбу жараён якунларига кўра лавозимидан бутунлай четлатилмаган.