ВАРШАВА, 23 февраль. /“Дунё” АА/. Ўзбекистон элчихонаси ва Миграция агентлиги ҳамкорлигида оғир моддий қийинчиликка тушиб қолган бир гуруҳ ҳамюртларимиз ватанга қайтарилди, деб хабар қилмоқда “Дунё” АА мухбири.

Аниқланишича, ватандошларимизнинг мушкул вазиятларга тушиб қолишига турли ҳолатлар сабаб бўлган. Кимдир ҳужжатларини йўқотгани боис ишга жойлаша олмаган бўлса, бошқа биров меҳнат фаолияти давомида оғир хасталикка чалинган.

Жумладан, ҳужжатларини йўқотиб, ишсиз ва оғир молиявий аҳволга тушиб қолган хоразмлик ҳамюртимиз Ю.А полиция органлари томонидан ушланганидан сўнг, унга зудлик билан консуллик-ҳуқуқий ёрдам кўрсатилди. Унга Миграция агентлиги билан ҳамкорликда авиачипта ва вақтинчалик қайтиш сертификати расмийлаштирилди ҳамда ватанга қайтарилди.

Ҳужжатлари ўғирланиб мушкул вазиятга тушиб қолган қашқадарёлик юртдошимизга ҳам ўз вақтида ёрдам кўрсатилиб, Ўзбекистонга қайтиши таъминланди.

Лодзь воеводалиги Велюн шаҳрида юрак хуружи оқибатида вафот этган, наманганлик ватандошимизнинг жасади Миграция агентлиги билан ҳамкорликда Ўзбекистонга қайтарилди.

Польшадаги логистика компаниясида ишлаган ва хизмат сафари давомида Эстониянинг Тарту шаҳрида инсультга учраган тошкентлик З.Мга ҳам ҳар томонлама амалий ёрдам кўрсатилди. У Ўзбекистоннинг Польша ва Латвиядаги элчихоналари, Миграция агентлиги ҳамда “Uzbekistan Airways” авиакомпанияси кўмагида махсус тиббий жиҳозлар ва шифокорлар кузатувида “Рига–Тошкент” йўналиши бўйича ватанга олиб келиниб, шифохонага жойлаштирилди.

Шунингдек, иш жойида бахтсиз ҳодиса натижасида оёғи синган андижонлик Т.Ига биринчи тиббий ёрдам кўрсатилиб, Миграция агентлиги билан ҳамкорликда Ўзбекистонга қайтарилиши таъминланди.

Бундан ташқари, иш жойида йиқилиб, мия чайқалиши оқибатида касалхонага жойлаштирилган наманганлик Н.Анинг ҳолати доимий назоратга олиниб, унга зарур тиббий муолажаларни олишда амалий ёрдам кўрсатилди.

Элчихона дипломатлари фуқароларимиз дуч келаётган бу каби муаммоларни тизимли ўрганиш мақсадида турли чора-тадбирларни амалга ошириб келмоқда. Дипломатлар ҳамюртларимизнинг яшаш жойлари (хостеллар) ва меҳнат фаолиятини жойига чиққан ҳолда ўрганмоқда.