ЛОНДОН, 29 апрель. /“Дунё” АА/. Британиянинг “London Post”нашрида Ўзбекистон ва Чехия ўртасидаги муносабатларнинг сўнгги ўттиз йил ичида босиб ўтган йўли ва бугунги стратегик аҳамияти таҳлил қилинган мақола чоп этилди, деб хабар бермоқда “Дунё” АА мухбири.

Мақолада қайд этилишича, Тошкент ва Прага ўртасидаги алоқалар оддий протокол учрашувларидан тизимли ҳамкорлик даражасига кўтарилди. Айниқса, 2023 йил муносабатларда сифат жиҳатидан янги бурилиш ясади. Икки мамлакат ҳукумат раҳбарларининг ўзаро ташрифлари якунида имзоланган “Кенгайтирилган ҳамкорлик тўғрисида”ги қўшма декларация шерикликнинг келгуси йиллар учун стратегик йўналишларини белгилаб берди.

Нашрнинг ёзишича, сиёсий ирода иқтисодий соҳада ҳам ўз мевасини бермоқда. Бугунги кунда Ўзбекистонда Чехия капитали иштирокидаги 40 дан ортиқ компания фаолият юритмоқда. Жумладан, “Škoda Group” компаниясининг юртимизда темир йўл ҳаракатланувчи таркибини маҳаллийлаштириш ва хизмат кўрсатиш бўйича қўшма корхона ташкил этиш ҳамда “Škoda Academy”негизида мутахассислар тайёрлаш борасидаги ташаббуслари юқори баҳоланган.

Муаллиф Чехиянинг иқтисодий мураккаблик индекси бўйича дунёда 7-ўринда эканига эътибор қаратиб, бу Ўзбекистон саноатини модернизация қилишда катта аҳамият касб этишини таъкидлаган. Энергетика, машинасозлик, соғлиқни сақлаш ва қишлоқ хўжалиги соҳаларидаги ҳамкорлик икки давлат иқтисодиёти учун бирдек манфаатлидир.

Маданий-гуманитар соҳада ҳам салмоқли натижаларга эришилди. Термиз давлат университети ва Карлов университетининг 20 йиллик қўшма археологик экспедицияси, шунингдек, Чехияда таҳсил олаётган ўзбекистонлик талабалар сонининг сўнгги 5 йилда икки баравар кўпайгани (700 нафарга яқин) халқлар ўртасидаги яқинликнинг белгисидир. Ҳар ҳафта амалга оширилаётган Тошкент–Карловы Вары тўғридан-тўғри авиақатновлари эса туристик ва ишбилармонлик алоқаларини янада қулайлаштирмоқда.

“London Post” нашрининг хулоса қилишича, Ўзбекистоннинг Прагада ўз элчихонасини очиш режаси икки томонлама алоқаларни тезкорлик билан мувофиқлаштириш ва қўшма лойиҳаларни самарали амалга оширишда муҳим қадам бўлади. Чехия Ўзбекистон учун Европа тизимидаги энг ишончли ва стратегик технологик ҳамкорлардан бири сифатида ўз ўрнини мустаҳкамламоқда.