ТОШКЕНТ, 22 май. /“Дунё” АА/. Бугун Ўзбекистон ташқи ишлар вазири Бахтиёр Саидов мамлакатимизда дипломатик миссиясини якунлаётган Покистон элчиси Аҳмад Фарукни қабул қилди, деб хабар бермоқда “Дунё” АА мухбири.

“Покистоннинг Ўзбекистондаги элчиси Аҳмад Фарук билан унинг дипломатик миссияси якунлангани муносабати билан хайрлашув учрашуви ўтказилди”, – деб ёзди Ўзбекистон ТИВ раҳбари ўзининг telegram-каналида. – Ўзбекистон билан Покистон ўртасидаги стратегик шериклик муносабатларини янада мустаҳкамлаш, савдо, инвестиция, таълим, маданий алмашинув ва бошқа йўналишларда амалий ҳамкорликни кенгайтириш масалаларини муҳокама қилдик.

Жаноб элчига келгуси фаолиятида улкан муваффақият тилаймиз”.

Эслатиб ўтамиз, Аҳмад Фарук Муҳаммад 2023 йил 12 апрель куни Ўзбекистон Президенти Шавкат Мирзиёевга ишонч ёрлиқларини топширган эди.

“Дунё” АА сурати