БЕЛГРАД, 4 июнь. /«Дунё» АА/. Ўзбекистон парламент делегациясининг Белградга расмий ташрифи доирасида Олий Мажлис Сенати раиси Танзила Нарбаеванинг Сербия Президенти Александр Вучич билан учрашуви бўлиб ўтди, деб хабар бермоқда “Дунё” АА мухбири.

Парламент юқори палатаси маълумотига кўра, учрашувда Сербия Президенти Ўзбекистон Президенти Шавкат Мирзиёевга самимий ва эзгу тилакларини йўллаб, икки мамлакат ўртасидаги муносабатлар ўзаро ишонч ва дўстлик руҳида изчил ривожланиб бораётганини алоҳида таъкидлаб ўтди.

Суҳбат чоғида олий даражада сиёсий мулоқотни давом эттириш, савдо-иқтисодий алоқаларни кенгайтириш ҳамда истиқболли қўшма лойиҳаларни амалга ошириш масалаларига эътибор қаратилди. Хусусан, тўқимачилик, фармацевтика, қишлоқ хўжалиги, туризм, транспорт-логистика, саноат кооперацияси ва энергетика каби йўналишларда икки томонлама ҳамкорлик салоҳияти юқори экани қайд этилди.