ВАШИНГТОН, 30 апрель. /“Дунё” АА/. Россия президенти Владимир Путин ва АҚШ етакчиси Дональд Трамп телефон орқали мулоқот қилди, деб хабар бермоқда “Дунё” АА мухбири “The New York Times” газетасига таяниб.

Узоқ давом этган муҳокама давомида томонлар яқин кунларда Украинада қисқа муддатли ўт очишни тўхтатиш тўғрисида келишиб олган.

Россия президенти ёрдамчиси Юрий Ушаков маълум қилишича, ўт очишни тўхтатиш ташаббуси Иккинчи жаҳон уруши якунланганини нишонлаш санаси, 9 май – Ғалаба кунига тўғри келиши мумкин. Бироқ у аниқ муддатлар қачон бошланиши ёки қанча давом этишини очиқламаган.

Россия томонининг айтишича, Владимир Путин Дональд Трамп билан мулоқотда Ғалаба куни муносабати билан ўт очишни тўхтатишни эълон қилишга тайёр эканини билдирган. Дональд Трамп ушбу ташаббусни қўллаб-қувватлашини айтган.

Америка етакчиси Оқ уйда журналистларга: “Мен бир муддат ўт очишни тўхтатишни таклиф қилдим ва менимча, у буни қила оларди. Шунча одам ҳалок бўляпти – бу бемаънилик”, деган.

Ўз навбатида, Украина томони Киев ўт очишни тўхтатиш тўғрисида қарор қабул қилишдан олдин АҚШ ва Россия президентлари нимани муҳокама қилганини аниқлаши кераклигини айтди. Шу ой бошида Москва ва Киев православ Пасхаси муносабати билан ўт очишни тўхтатиш тўғрисида келишув имзолаган, бироқ томонлар бир-бирини кўплаб қоидабузарликларда айблади.

Давлат раҳбарлари телефон орқали мулоқот чоғида Эрон атрофидаги вазиятни ҳам муҳокама қилди. Юрий Ушаковнинг сўзларига кўра, Владимир Путин АҚШнинг Эронга нисбатан ўт очишни тўхтатиш режимини узайтириш тўғрисидаги қарори тўғри эканини ва музокараларга имконият беришини айтган.

“Владимир Путин АҚШ ва Исроил зўравонлик ҳаракатларига қўл урса, нафақат Эрон ва унинг қўшнилари, балки бутун халқаро ҳамжамият учун ўта зарарли оқибатлар олиб келиши мумкинлигига эътибор қаратди. Шунингдек, Эрон ҳудудида қуруқликдаги операция мутлақо номақбул ва хавфли танлов эканини таъкидлади”, деди Россия етакчиси вакили.

“The Associated Press” агентлиги сурати