ИСЛОМОБОД, 15 апрель. /“Дунё” АА/. Покистон оммавий ахборот воситалари бўлажак бешинчи юбилей Тошкент халқаро инвестиция форумини кенг ёритмоқда, деб хабар бермоқда “Дунё” АА мухбири.

Хусусан, мамлакатнинг марказий “Associated Press of Pakistan” АА ҳамда бошқа етакчи нашрлар “Тошкент Марказий Осиёнинг инвестиция пойтахти сифатида: V юбилей Халқаро инвестиция форуми нималарни ваъда қилмоқда” сарлавҳали мақолаларни эълон қилди.

Мақолаларда қайд этилишича, 2026 йил 16–19 июнь кунлари Тошкент шаҳрида мамлакатимизнинг энг йирик инвестициявий платформаси ва минтақанинг энг муҳим бизнес-форумларидан бири бўлиб ўтади. Бу йилги анжуман “Investment Resilience: New Frontiers, New Partnerships” шиори остида ташкил этилмоқда.

Тошкент халқаро инвестиция форуми (ТХИФ-2026) мамлакат иқтисодиёти билан бир қаторда ўз миқёсини ҳам изчил кенгайтириб бормоқда. Ўтган йилги форум 8 000 дан ортиқ иштирокчини тўплади, улардан қарийб 3 000 нафари дунёнинг 97 давлатидан келган хорижий делегатлар бўлди. Имзоланган шартнома ва келишувларнинг умумий ҳажми эса 30,5 миллиард долларни ташкил этди.

Бўлажак юбилей тадбирининг марказий мавзуси 2026 йил март ойида Ўзбекистон Президенти фармони билан ташкил этилган Тошкент халқаро молия маркази бўлади. ТХИФ-2026 ишбилармонлик дастури тўртта асосий блок атрофида тузилган бўлиб, улар инвестиция барқарорлиги, капитални ҳимоя қилиш, молиявий инфратузилмани ривожлантириш, логистика коридорлари ва иқлимни молиялаштириш масалаларини ўз ичига олади.

Покистон ОАВ альтернатив инвестиция фондлари учун регуляторлик асосларини муҳокама қилиш, Ўрта коридор ва Транскаспий логистикасини ривожлантириш, шунингдек, Марказий Осиё давлатларининг суверен рейтинглари ва аралаш молиялаштириш воситалари билан ишлаш амалиётига бағишланган сессияларга алоҳида эътибор қаратмоқда.

Мақолаларда энергетика масалалари ва Ўзбекистоннинг 2030 йилгача электр энергияси ишлаб чиқаришда қайта тикланувчи энергия манбалари улушини 54 фоизга етказиш бўйича стратегик мақсадига ҳам тўхталиб ўтилган.Кутилишича, ТХИФ-2026 янада кенгроқ кўламда ўтиб, кўплаб мамлакатлардан инвесторларни жалб қилади.