КИЕВ, 7 январь. /“Дунё” АА/. Мамлакатимизнинг Украинадаги элчихонаси томонидан Ташқи сиёсий тадқиқотлар институти билан ҳамкорликда “Ўзбекистоннинг янгиланган ташқи сиёсати” мавзусида давра суҳбати ўтказилди, деб хабар қилмоқда “Дунё” АА мухбири.

Тадбирда дипломатлар, экспертлар ва таҳлилчилар иштирок этди. Иштирокчилар глобал турбулентлик, давлатлараро можароларнинг кучайиши ва халқаро муносабатлар тизимининг қайта шаклланиши фонида Ўзбекистон ташқи сиёсий курсининг трансформациясини муҳокама қилди.

Таъкидланишича, Президент Шавкат Мирзиёев даврида Тошкент халқаро фаолликни оширмоқда ва Марказий Осиёда яхши қўшничилик ҳамда ишончни мустаҳкамлашга, кўп векторли сиёсий-иқтисодий алоқаларни ривожлантиришга, савдо ва инвестицияларни диверсификация қилишга эътибор қаратган ҳолда ҳамкорликнинг янги йўналишларини изчил шакллантирмоқда.

Устувор йўналишлар қаторида транспорт ва логистика, яшил энергетика, сув ресурсларини бошқариш ва иқлим ўзгариши масалалари ҳам қайд этилди. Иштирокчилар иқтисодий дипломатиянинг амалий натижадорлигини ҳамда Ўзбекистоннинг халқаро ташкилотлар билан ўзаро алоқалари ўсаётганини таъкидлаб, мамлакатда Парламентлараро иттифоқ ва ЮНEСКО шафелигида йирик халқаро тадбирлар ўтказилганига эътибор қаратди.

Ўзбекистоннинг Европа Иттифоқи билан ҳамкорлигига алоҳида эътибор қаратилди. Экспертлар энергетика хавфсизлиги, барқарор транспорт коридорлари, яшил иқтисодиёт, сув бошқаруви, таълим ва гуманитар дастурлар бўйича томонларнинг манфаатлари ўзаро мос келишини таъкидлаб, Ўзбекистоннинг Марказий Осиёда Европа Иттифоқи учун асосий ҳамкорлардан бири сифатидаги ролини қайд этди.

Давра суҳбати Украинанинг “Iнтерфакс-Украiна” умуммиллий ахборот агентлиги ҳамда “Open4business”, “Fixygen” ва “rebuild.news” каби қатор ахборот ресурсларида кенг ёритилди.