БРЮССЕЛЬ, 8 январь. /“Дунё” АА/. Европанинг “EU Reflect” таҳлилий нашрида Марказий Осиё бўйича эксперт ва тарихчи Дерья Сойсалнинг “Ўзбекистонда кенг кўламли ўзгаришларнинг ўн йиллиги” номли мақоласи эълон қилинди, деб хабар бермоқда “Дунё” АА мухбири.

Мақола муаллифи 2025 йил Ўзбекистоннинг ташқи сиёсий позициясини сифат жиҳатидан янгилаш ва мустаҳкамлаш даври бўлганини алоҳида таъкидлаган. Ўзбекистон Президенти Шавкат Мирзиёев Бельгияга, Европа Иттифоқи пойтахти Брюссель шаҳрига ташриф буюриб, Европа комиссияси президенти Урсула фон дер Ляйен билан Кенгайтирилган шериклик ва ҳамкорлик тўғрисидаги муҳим битимни имзолаганини эътироф этган.

Мазкур меморандумининг имзоланиши, Самарқандда “Европа Иттифоқи – Марказий Осиё” саммитининг ўтказилиши, ЮНЕСКОнинг 43-Бош конференциясининг Самарқандда (илк бор Париждан ташқарида) ташкил этилиши, Шавкат Мирзиёевнинг АҚШда Дональд Трамп билан учрашуви – буларнинг барчаси мамлакатнинг мисли кўрилмаган ташқи сиёсий динамикасидан далолат беради.

Экспертнинг фикрича, Ўзбекистоннинг 2025 йилдаги ташқи сиёсати муваффақиятли бўлди. Президент раҳбарлигида мамлакат очиқ, прагматик, фаол ва ташаббускор ташқи сиёсатни изчил амалга ошириб келмоқда. Марказий Осиёда катта ўзгаришлар юз берди. Қирғизистон ва Тожикистон ўртасида тинчлик шартномаси имзоланди. Айтиш мумкинки, ушбу чегара масаласидаги можарони ҳал қилишда айнан Ўзбекистон асосий воситачилик ролини ўйнади.

Ўзбекистон ўта муваффақиятли ташқи сиёсатни шакллантира бошлади, бутун дунё бўйлаб шериклик алоқаларини тўплади. Шу нуқтаи назардан, 2025 йилда қатор стратегик аҳамиятга эга воқеалар мамлакатнинг халқаро майдондаги ўрнига чуқур таъсир кўрсатди. Бугунги кунда Ўзбекистон АҚШ, Хитой, Европа Иттифоқи, Туркия, Яқин Шарқ мамлакатлари ва бошқа кўплаб давлатлар ҳамда минтақаларнинг диққат марказида турибди. Ушбу акторларнинг ҳар бири тобора кўпроқ эътироф этилаётган Ўзбекистон билан ҳамкорликни мустаҳкамлашга интилмоқда.

2021 йилдан бошлаб Ўзбекистон Европа Иттифоқи Преференциялар бош тизимининг GSP+ режими (Барқарор ривожланишни рағбатлантириш махсус схемаси) доирасида Европа Иттифоқи бозорига бир томонлама имтиёзли киришдан фойдаланмоқда. Президент Шавкат Мирзиёев мамлакатни глобал бозор учун очди ва Марказий Осиёни Европа Иттифоқи билан яқинлаштириш асосий йўналишлардан бирига айланди.

Кенгайтирилган шериклик ва ҳамкорлик тўғрисидаги битимнинг имзоланиши ҳамда Ўзбекистон Президентининг Брюсселга ташрифи ЕИ билан муносабатлар сифат жиҳатидан янги босқичга кўтарилганини кўрсатди.