МАДРИД, 7 январь. /“Дунё” АА/. Испаниянинг оммабоп “El Mundo” нашрида “Таlgo компанияси Ўзбекистондаги тезюрар поездлар паркига техник хизмат кўрсатиш бўйича энг йирик шартномани имзолади” сарлавҳали мақола эълон қилинди, деб хабар бермоқда “Дунё” АА мухбири.

“Таlgo компаниясининг Ўзбекистондаги фаолияти 2009 йилда бошланган. Ўшанда 2 та тўққиз вагонли “Таlgo 250” поезди харид қилинган ва улар 2011 йилда фойдаланишга топширилган эди”, – деб ёзади муаллиф.

Таlgo компанияси “Ўзбекистон темир йўллари” АЖ билан ҳозирда мамлакатда фойдаланилаётган 6 та “Таlgo 250” поездига ўн йил давомида комплекс техник хизмат кўрсатиш бўйича қиймати қарийб 80 миллион еврога тенг шартномани имзолаган.

Нашрда қайд этилишича, ушбу шартнома турли келишувлар доирасидаги 15 йилдан ортиқ давом этган ҳамкорлик натижасида имзоланди ва Таlgo компаниясининг Ўзбекистондаги техник хизмат кўрсатиш бўйича энг йирик битимига айланди.

“Таlgo 250” поездларининг максимал тижорий тезлиги соатига 230 километрни ташкил этади. Ваҳоланки, уларнинг лойиҳавий тезлиги соатига 275 кмга тенг. 2011 йилда қўшимча 2 та ўн бир вагонли таркибни етказиб бериш бўйича иккинчи шартнома имзоланган бўлиб, улар 2017 йилдан буён эксплуатация қилинмоқда.

2019 йилда “Ўзбекистон темир йўллари” АЖ ўз паркини ҳар бири ўн бир вагондан иборат яна 2 та “Таlgo 250” поезди, 4 та қўшимча вагон билан кенгайтирди. Натижада, биринчи шартнома бўйича етказиб берилган 2 та поезднинг вагонлар сони ўн биттага етказилди ва улар 2021 йилда ҳаракатланишни бошлади.

“Ўзбекистонда “Таlgo 250” поездлари Испанияда “Alvia” компанияси томонидан хизмат кўрсатиладиган 130 ва 730 русумли поездларга ўхшаш схема бўйича ишлатилади. Улар кузовнинг табиий оғиш технологияси билан жиҳозланган бўлиб, бу вагонларнинг оғиши ҳисобига йўлнинг бурилиш қисмларида тезликни ошириш имконини беради. Испания моделларидан фарқли ўлароқ, Ўзбекистондаги поездлар учун ғилдирак жуфтликларининг кенглигини ўзгартириш талаб этилмайди. Чунки улар 1520 миллиметр кенгликдаги Россия стандартидаги қатъий ўлчамли рельсларда ҳаракатланади”, – дея таъкидланган нашрда.