ҚОҲИРА, 8 сентябрь. /“Дунё” АА/. Ўзбекистон элчихонаси вакиллари ушбу давлат  қишлоқ хўжалиги ва мелиорация вазири Алаа Фаруқ ҳамда унинг ўринбосари Саад Муса билан учрашди, деб хабар бермоқда “Дунё” АА мухбири.

Мулоқотда жорий йил сентябрь ойининг иккинчи ярмида Ўзбекистоннинг қишлоқ хўжалиги ва чорвачилик соҳалари вакилларидан иборат ишчи гуруҳнинг Мисрга амалий ташрифини ташкил этиш масалалари муҳокама қилинди.

Миср томони Ўзбекистонда картошка етиштириш, чўл ерларни ўзлаштириш ва замонавий суғориш тизимларини жорий этишда Миср тажрибасидан фойдаланилаётганини қайд этди ҳамда ташрифни қўллаб-қувватлашга тайёрлигини билдирди.

Ташриф доирасида чорвачилик, ем-хашак етиштириш, чўл ерларни ўзлаштириш бўйича илғор тажриба билан танишиш, икки мамлакат тадбиркорлари иштирокида давра суҳбати ва В2В учрашувлар ўтказиш режалаштирилган.

Томонлар қўшма лойиҳаларни амалга ошириш, илмий-тадқиқот ишларини ривожлантириш ва янги нав ҳамда озуқа экинларини яратиш бўйича ҳамкорлик қилишга келишиб олди.

Шунингдек, Мисрнинг Африка бозорларига чиқиш имкониятларидан фойдаланган ҳолда қитъада Ўзбекистон иштирокида чорвачилик лойиҳаларини амалга ошириш истиқболлари муҳокама қилинди.